Бахши ҳизби наҳзати исломии Тоҷикистон дар вилояти Суғд барои тахриби бинои дафтари кориаш дар маркази маъмурии вилоят нимаи моҳи июн пагоҳ аз болои мақомоти шаҳрдории Хуҷанд ба додгоҳ шикоят бурданист. Дар ин бора ба «Азия-Плюс» раиси бахши ҲНИТ дар вилояти Суғд Илҳомҷон Ёқубов хабар дод.
Ба гуфтаи ӯ, намояндагони мақомоти шаҳрдории Хуҷанд рӯзи 17-уми июн зимни кӯчонидани дафтари кории бахши ҲНИТ дар шаҳр ба онҳо итминон дода буданд, ки арзиши бино ҷуброн гардида, барои сохтмони бинои нави дафтари корӣ аз ҷониби ҳукумат қитъаи замин ҷудо карда мешавад.
«Рӯзи 2-юми июл мо расман ба мақомоти шаҳрдории Хуҷанд ҷиҳати иҷрои ваъдаашон муроҷиат намудем, вале то ҳанӯз ба мактубамон посух нагирифтаем, – мегӯяд Ёқубов. – Агар имрӯз, 11-уми август раҳбарияти шаҳрдорӣ ба мактуби мо посух нагӯяд, мо маҷбурем, ки рӯзи 12-уми август ба мақомоти судӣ бо аризаи даъвогӣ муроҷиат кунем».
