Муддати чандин сол Русия шарики асосии сармоягузори Тоҷикистон бо сармояи умумии андӯхта дар ҳаҷми беш аз 1,6 млрд. доллари ИМА боқӣ мемонад.
Бино ба маълумоти намояндагии дипломатии Русия дар Душанбе, айни замон дар Тоҷикистон беш аз 130 корхонаҳои русиягӣ ва корхонаҳои муштарак бо сармоягузории Русия фаъолият доранд.
«Маблағи умумии талафоти буҷети федералии Русия аз интиқоли маҳсулоти нафтӣ ба Тоҷикистон бидуни пардохти боҷи содиротӣ аз 12-уми ноябри соли 2013 ҳудуди 300 млн. доллари ИМА-ро ташкил доданд», – баён мегардад дар маълумоти сафоратхонаи Русия дар Тоҷикистон.
Зикр мегардад, ки ҳамасола муҳоҷирони кории тоҷик аз Русия ба ватанашон маблағҳои пулӣ интиқол медиҳанд, ки ба вазъи иҷтимоиву иқтисодии кишвар таъсири мусбат мерасонад ва соли гузашта ҳаҷми умумии маблағҳои пулии интиқолёфта аз Русия ба Тоҷикистон 4,2 млрд. доллари ИМА (48% нисбат ба ММД-и кишвар)ро ташкил додаанд.
«Русия ҳамасола барои таҳсили донишҷӯёни тоҷик дар макотиби олии Русия идрорпулиҳо ҷудо намуда, соли хониши 2013-2014 донишҷӯёни тоҷик бо 1133 ҷойи буҷетӣ таъмин гардиданд. Соли хониши 2014-2015 аз рӯи квотаҳои давлатӣ ба Тоҷикистон ҳудуди 800 ҷой барои таҳсил дар Русия ихтисос дода шуд», – зикр мегардад дар маълумоти сафоратхона.
Гуфта мешавад, давоми солҳои 2012-2013 аз ҷониби Хадамоти федералии назорати маводи нашъаовари Русия ба Агентии назорати маводи нашъаовари назди президенти Тоҷикистон дар ҳаҷми 2 млн. доллари ИМА ва тайи солҳои 2008-2013 ба маблаги 2,7 млн. доллари ИМА кумак расонида шуд.
