Вакилони Маҷлиси намояндагони Маҷлиси Олии Тоҷикистон, ки аз 1-уми август ба рухсатии меҳнатӣ рафта буданд, пагоҳ, 15-уми август дар кумита ва комиссияҳои палатаи поёни парлумон ба кор шурӯъ мекунанд.
Котиби матбуотии палатаи поёнии парлумони ҷумҳурӣ Муҳаммадато Султонов ба «Азия-Плюс» дар ин робита изҳор намуд, ки аз пагоҳ вакилон ба омӯзиши лоиҳаҳои қонунҳо, ки замони рухсатиашон аз ҷониби ҳукумат ва президент ворид шудааст оғоз мекунанд.
«Ғайр аз ин, то 1-уми октябр, санаи оғози иҷлосияи охирини даъвати ҳозираи палатаи поёнии парлумони Тоҷикистон, намояндагони мардумӣ бевосита ба фаъолияти қонунофарии худ машғул хоҳанд шуд», – афзуд Султонов.
Қобили зикр аст, ки мутобиқи меъёрҳои қонунгузории кишвар, маъракаи интихоботи навбатӣ ба Маҷлиси намояндагони Маҷлиси олии ҷумҳуриро президенти мамлакат на дертар аз 75 рӯз то анҷоми ваколатҳои вакилони палатаи поёнии парлумон, ки 28-уми феврали соли 2015 ба итмом мерасад, таъин мекунад. Интихобот ба маҷлисҳои маҳаллӣ дар як вақт бо интихобот ба палатаи поёнии парлумон сурат мегирад. Интихобот ба палатаи болоии парлумони Тоҷикистон пас аз 25 рӯзи баргузории интихоботи вакилон ба палатаи поёнии парлумон доир мегардад.
