Дар мулоқоти президенти Тоҷикистон Эмомалӣ Раҳмон бо муовини вазири корҳои хориҷии Ҷумҳурии Исломии Афғонистон Атиқуллоҳ Атифмал доираи васеи масоили вобаста ба рушди ҳамкории гуногунҷанбаи ду кишвари ҳамсоя баррасӣ шуд.
Бино ба иттилои хадамоти матбуоти сарвари давлат, ба масоили ҳамкории минтақавии Тоҷикистону Афғонистон, ки метавонад иқтидори транзитии ҳарду кишварро ба маротиб афзун намояд, таваҷҷуҳи зиёд зоҳир гардид.
Аз ҷумла масоили вобаста ба тезондани татбиқи лоиҳаҳои хатти барқии CASA-1000 ва роҳи оҳани Тоҷикистон-Афғонистон-Туркманистон ва ҳамчунин бартарафсозии мушкилоти тиҷоратию транзитии минтақавӣ дар маркази таваҷҷуҳи ду ҷониб қарор дошт.
