Зимни вохӯрии муовини раиси Ҳизби халқии демократии Тоҷикистон Асрор Латифзода бо сафири Ҷопон дар Тоҷикистон Такаши Камада, ки рӯзи шанбеи ҳафтаи гузашта доир гардид, масоили марбут ба рушди муносибатҳои тиҷоративу иқтисодӣ ва гуманитарӣ миёни кишварҳо, омодагирии ҲХДТ ба интихоботи парлумонии ахири моҳи феврали соли оянда мавриди баррасӣ қарор гирифтанд.
Сухангӯи ҲХДТ Усмон Солиев ба «Азия-Плюс» дар ин робита иттилоъ дод, ки А.Латифзода ба сафир ҳамчунин дар бораи таърихи таъсиси ҳизб, сохтор ва нақши он дар ҳаёти имрӯзаи сиёсии кишвар маълумот дод.
Дипломати Ҷопон дар бораи нақшаҳои кишвараш оид ба таҳкими пояҳои демократия дар Тоҷикистон, густариши ҳамкориҳои дуҷониба дар соҳаҳои сиёсат, иқтисод, тиҷорат ва ҳамчунин бахши иҷтимоӣ ибрози назар намуд.
«Сафир роҷеъ ба лоиҳаҳои аз ҷониби ҳукумати Ҷопон мавриди амал қарордошта дар Тоҷикистон дар соҳаҳои рушди деҳот ва омодакунии мутахассисони ҷавони тоҷик дар кишвараш низ маълумот дод», – қайд кард Солиев.
