Музаффар Давлатови 78-сола, падари Аловиддин Давлатов, бештар маъруф бо Алии Бедакӣ, яке аз ҷангиёне, ки дар ҳамлаи мусаллаҳона ба қатораи автомашинаҳои Вазорати мудофиаи Тоҷикистон моҳи сентябри соли 2010 дар дараи Камароб даст дошта, бар асари он 28 сарбозону афсарон ба ҳалокат расиданд, мавриди афв қарор гирифта ба озодӣ баромад. Дар ин бора Сарраёсати иҷрои ҷазои Вазорати адлияи ҶТ иттилоъ медиҳад.
Ба иттилои манбаъ, давоми ду рӯзи мавриди амал қарор гирифтани қонун «Дар бораи афв», ки ба муносибати 20-солагии Контситутсияи Тоҷикистон қабул шуд, аз муассисаҳои ислоҳӣ беш аз 2 ҳазор нафар маҳкумшудагон озод гардидаанд.
Ёдрас мекунем, ки падари Алии Бедакӣ барои «хабар надодан дар бораи амали террористӣ» ба 7 соли зиндон маҳкум шуда буд. Алии Бедакӣ зимни амалиёти махсуси сохторҳои қудратии Тоҷикистон моҳи январи соли 2011 дар қаламравии водии Рашт кушта шуд.
