Муддати зиёда аз 20 соли соҳибистиқлолӣ бори нахуст дар Тоҷикистон беш аз 1 млн. тонна семент истеҳсол карда шуд.
Тавре аз Вазорати саноат ва технологияҳои нави ҷумҳурӣ хабар доданд, ин миқдор сементи истеҳсолшуда нисбат ба нишондиҳандаи ҳамин давраи соли гузашта 776 ҳазор тонна зиёдтар аст.
«Ба туфайли фаъолияти пурсамари ду корхонаи бузурги истеҳсоли сементи Тоҷикистон – «Хуаксин Ғаюр семент» ва «Сементи тоҷик» чунин натиҷа ба даст омад. Аз оғози сол дар корхонаи «Хуаксин Ғаюр семент» 760 ҳазор тонна ва дар корхонаи «Сементи тоҷик» 178,2 ҳазор тонна семент истеҳсол карда шуд, ки нишондиҳандаи беҳтарин аз солҳои 80-уми асри гузашта маҳсуб меёбад. Чанд сол қабл дар Тоҷикистон ҳаҷми истеҳсоли семент ба 900 ҳазор тонна расонида шуд, вале ин нишондиҳанда дигар афзоиш наёфта буд», – гуфтанд дар вазорат.
Ба иттилои манбаъ, феълан дар Тоҷикистон 10 корхонаи истеҳсоли семент фаъолият дорад. Талаботи Тоҷикистон ба семент бо назардошти афзоиши корҳои сохтмонӣ 2 млн. тонна дар як сол арзёбӣ мешавад.
Соли 2013 дар Тоҷикистон 385 ҳазор тонна семент истеҳсол шуд. Ба Тоҷикистон семент асосан аз Покистон, Афғонистон, Эрон, Русия, Қазоқистон ва Қирғизистон ворид мешавад.
