Санаи 9-уми декабр вазири корҳои хориҷии Тоҷикистон Сироҷидин Аслов сафири Шоҳигарии Арабистони Саудӣ дар Тоҷикистон Бандар Ҷамил Маҳмудро ба ҳузур пазируфт.
Бино ба маълумоти департаменти иттилооти Вазорати корҳои хориҷии ҶТ, дар оғози вохӯрӣ сафир ба С.Аслов паёми Подшоҳи Шоҳигарии Арабистони Саудӣ Абдуллоҳ ибни Абдулазиз Оли Саудро ба унвони Президенти Ҷумҳурии Тоҷикистон Эмомалӣ Раҳмон супорид.
Сипас дар рафти суҳбат масоили мубрами рушд ва тавсеаи ҳамкориҳои дуҷониба ва бисёрҷонибаи ду кишвар мавриди баррасӣ қарор гирифтанд.
Гуфта мешавад, худи ҳамон рӯз вохӯрии Сироҷидин Аслов бо сафири Ҷумҳурии Маҷористон дар Тоҷикистон (бо қароргоҳ дар Остона) Имре Лослотски барпо гардид.
Дар рафти вохӯрӣ ҷонибҳо масъалаҳои мубрами ҳамкории Тоҷикистону Маҷористонро дар соҳаҳои иқтисод, тиҷорат, маориф ва дигар бахшҳои мавриди таваҷҷуҳи тарафайн муҳокима намуданд.
Зимни суҳбат ҳамчунин оид ба ҳамкории ду кишвар дар чаҳорчӯби созмонҳои байналмилалию минтақавӣ табодули назар сурат гирифт.
