Музди меҳнати миёна дар ноҳияи кӯҳистони Ховалинги вилояти Хатлон дар соли гузашта 956,81 сомониро ташкил дод, ки дар муқоиса бо соли 2013 ба андозаи 74,7 сомонӣ зиёдтар аст.
Раиси ноҳияи Ховалинг Нурулло Мирзоев зимни нишасти хабарӣ изҳор намуд, ки соли гузашта қисмати даромади буҷет, ки 7 млн. 369,9 ҳазор сомонӣ муқаррар шуда буд, ба андозаи 18,8% барзиёд иҷро гардид. «Ин маблағҳо ба соҳаҳои маориф (227 ҳазор сомонӣ), тандурустӣ (37,4 ҳазор сомонӣ), фарҳанг (177 ҳазор сомонӣ) ва варзиш (18,4 ҳазор сомонӣ) равона гардиданд», – иброз дошт ӯ.
Бино ба иттилои раиси ноҳия, ба барзиёд иҷро шудани нақшаҳо беҳбуди заминаи андозбандӣ низ мусоидат намуда, давоми сол 300 ҷойи кори доимӣ фароҳам оварда шудааст, ки 240-то онҳо (корхонаҳои хурд) ба истеҳсоли маҳсулоти таъиноти саноатӣ ва ниёзи аввалияи мардум нигаронида шудаанд.
«Ба фонди нафақаи ноҳия аз нақша 25,6 ҳазор сомонӣ зиёдтар маблағ ҷамъоварӣ шуд, ки тайи 10 соли ахир бори нахуст дар ноҳия аст», – таъкид дошт Н.Мирзоев.
