Дар мақомоти шаҳрдории пойтахт имрӯз таҳти раёсати раиси шаҳри Душанбе Маҳмадсаид Убайдуллоев ҷаласаи корӣ доир гардид, ки дар он масъалаҳои марбут ба афзоиши вуруди маблағҳо ба буҷети шаҳр ва истифодаи мақсадноки моликияти коммуналии шаҳр баррасӣ шуданд.
Котиби матбуотии раиси пойтахт Шавкат Саидов ба «Азия-Плюс» дар ин робита иттилоъ дод, ки раиси пойтахт ба сохторҳои дахлдор дастур дод, ки дар фурсати наздиктарин монеъаҳои маъмурӣ дар самти ба иҷора додани иншооти коммуналии шаҳрро баратараф намоянд.
«Дар ҷаласа ҳамчунин ба масъалаҳои истифодаи самараноки нерӯи барқ ва ҷамъоварии саривақтии маблағи истифодаи он, вазъи санитариву эпидемиологӣ дар шаҳр, бартараф кардани савдои кӯчагӣ, насби видеокамераҳо дар тамоми корхонаҳои пойтахт новобаста аз шакли моликияти онҳо, аз байн бурдани сагҳои дайду дар қаламрави пойтахт ва дигар масъалаҳои рӯзмарраи хоҷагидории пойтахт таваҷҷуҳ зоҳир гардид», – гуфт ӯ.
Зимнан зикр гардид, ки дар ҷаласа оид ба таҷлили ҷашни Наврӯз санаи 21-уми март – дар сатҳи кӯчаву микрорайонҳо, санаи 23 март – дар Наврӯзгоҳи пойтахт ва санаи 24-уми март баргузор кардани чорабиниҳои сарсабзу хуррам гардонидани пойтахт қарор қабул шуд.
