Вакилони Маҷлиси вакилони халқи ноҳияи Исмоили Сомонии пойтахт роҳбари дастгоҳи иҷроияи президенти Тоҷикистон Бахтиёр Худоёрзодаро бори навбатӣ номзад ба аъзогии Маҷлиси миллии Маҷлиси Олии Тоҷикистон, ки санаи 27 март доир мегардад, пешбарӣ намуданд. Бахтиёр Худоёрзода ба ҳайати даъвати гузаштаи палатаи болоии парлумон низ шомил буд.
Аз КМИР Тоҷикистон ба «Азия-Плюс» дар ин робита иттилоъ доданд, ки Маҷлиси вакилони халқи ноҳияи Синои шаҳри Душанбе омӯзгори маҳаллӣ Наргис Раҳмоноваро номзад ба аъзогии палатаи болоии парлумон пешбарӣ кардаанд.
Ба иттилои манбаъ, Нуралӣ Шоев, ректори Донишгоҳи техникии Тоҷикистон ба номи академик М.Осимӣ аз Маҷлиси вакилони халқи ноҳияи Фирдавсӣ ва Маҳмадюсуф Имомов, ректори Донишгоҳи миллии Тоҷикистон аз Маҷлиси вакилони халқи ноҳияи Шоҳмансури пойтахт номзадҳо ба аъзогии Маҷлиси миллии Маҷлиси Олии Тоҷикистон пешбарӣ шудаанд.
Ёдрас мекунем, ки раиси шаҳри Душанбе Маҳмадсаид Убайдуллоев аз Маҷлиси вакилони халқи пойтахт номзад ба аъзогии палатаи болоии парлумон пешбарӣ шуд.
