Муовини прокурори генералӣ, сарпрокурори ҳарбии Тоҷикистон Сафаралӣ Мирзозода дар машварати кории рӯзи 30 март аз масъулони корҳои ташкили даъвати баҳорӣ ба хизмати ҳарбӣ, ки 1 апрел шурӯъ мегардад, даъват намуд, ки дар ҷараёни даъват қатъиян ба қонун риоя карда, ба таҷрибаи даъвати ғайриқонунии наваскарон ба хизмат хотима бахшанд. Дар ин бора ба «Азия-Плюс» як манбаъ аз Вазорати мудофиаи ҶТ хабар дод.
Бино ба иттилои манбаъ, дар машварати корӣ кормандони сохторҳои қудратӣ, Вазорати тандурустӣ ва ҳифзи иҷтимоии аҳолӣ, Вазорати маориф ва илм, комиссарони ҳарбии вилоят ва шаҳру навоҳии кишвар ва фармондеҳони қисмҳои низомӣ иштирок карданд.
«Дар машварат ба масъалаҳои аз муоинаи хушсифати тиббӣ гузаштани даъватшавандагон, роҳ надодани ба содир гардидани ҷиноятҳои коррупсионӣ дар ҷараёни даъват ва фароҳам овардани шароити мусоид барои кори аъзои комиссияҳои даъват дар тамоми манотиқи кишвар таваҷчуҳи хосса зоҳир гардид», – гуфт манбаъ.
