Дар шаҳри Брюссел вохӯрии сафири Тоҷикистон дар Шоҳигарии Белгия Рустамҷон Солиев бо раиси Палатаи савдо ва саноати Белгия, Нидерланд ва Люксембург (Бенилюкс) оид ба ҳамкорӣ бо кишварҳои ИДМ Мигел Кардон де Лихтбауэр ва ноиби ӯ Конрад Микелсон баргузор гардид.
Бино ба иттилои Вазорати корҳои хориҷии ҶТ, зимни сӯҳбат масоили ба роҳ мондани ҳамкории дуҷониба ва робитаҳои тиҷоратию иқтисодӣ байни Тоҷикистон ва кишварҳои Бенилюкс муҳокима шуданд.
Гуфта мешавад, сафири Тоҷикистон ба мусоҳибон оид ба вазъи сиёсӣ ва иҷтимоию иқтисодии кишвар, чораҳои Ҳукумати Тоҷикистон ҷиҳати беҳсозии фазои сармоягузорӣ ва соҳибкорӣ, инчунин соҳаҳои авлавиятноки иқтисодиёти миллии мавриди ҳавасмандии сармоягузорон ва доираҳои соҳибкории хориҷӣ маълумоти муфассал дод.
Зикр мегардад, ки ба намояндагони баландпояи Палатаи савдо ва саноати Бенилюкс ҳамчунин маводҳои иттилоотӣ оид ба имконоти сармоягузории Тоҷикистон супорида шуданд. Онҳо омодагию ҳавасмандии махсуси худро оид ба роҳ мондани ҳамкорӣ бо Тоҷикистон иброз доштанд.
