Дар шаҳри Минск рӯзи 12 май мулоқоти вазири адлияи Беларус Олег Слижевский бо сафири Тоҷикистон дар ин кишвар Қозидавлат Қоимдодов баргузор шуд.
Бино ба иттилои намояндагии дипломатии Душанбе дар Минск, зимни мулоқот вазъи кунунӣ ва дурнамои ҳамкориҳои дуҷониба мавриди баррасӣ қарор гирифта, ба масъалаи ҷараёни амалисозии тавофуқоти ҳосилшуда миёни кишварҳо дар сатҳи олӣ зимни сафари расмии президенти Тоҷикистон Эмомалӣ Раҳмон ба Ҷумҳурии Беларус моҳи майи соли 2014 таваҷҷуҳи хосса зоҳир гардид.
Гуфта мешавад, дар ҷараёни вохӯрӣ сафири Тоҷикистон қайд кардааст, ки барои густариши тақвияти робитаҳои дуҷониба миёни ду кишвари дӯсту бародар заминаи мустаҳками қарордодиву ҳуқуқӣ муҳайё шудааст, ки беш аз 60 созишномаву қарордодҳои байнидавлатӣ, байниҳукуматӣ ва байниидоравиро дар бар мегирад.
Ба иттилои манбаъ, вазири адлияи Беларус таъкид доштааст, ки миёни Вазоратҳои адлияи Беларус ва Тоҷикистон муносибатҳои судманд роҳандозӣ шуда, Созишномаи соли 2012 дар бораи ҳамкорӣ баимзорасида миёни вазоратҳо мавриди амал қарор дорад,ки ба ин робитаҳо такон мебахшад.
Зимнан зикр мегардад, ки дар рафти мулоқот ҷонибҳо ҳамчунин атрофи дигар масъалаҳои мавриди таваҷҷуҳи тарафайн табодули назар намуданд.
