Раиси Маҷлиси намояндагони Маҷлиси Олии Тоҷикистон Шукурҷон Зуҳуров сафири Давлати Фаластин дар Тоҷикистон (қароргоҳ дар ш.Тошканд) Муҳаммад Абдулло Таршаҳониро ба ҳузур пазируфт.
Тавре як манбаъ аз палатаи поёнии парлумони кишвар ба «Азия-Плюс» дар ин робита иттилоъ дод, зимни мулоқот масоили густариши ҳамкориҳо ҳам дар шакли дуҷонибаву ҳам дар доираи созмонҳои байнулмилалӣ баррасӣ шуданд.
Ба иттилои манбаъ, сафири Фаластин изҳор доштааст, ки кишвараш ба омӯзиши таҷрибаи Тоҷикистон дар ноил гардидан ба сулҳу созиш дар ҷумҳурӣ ва ҳамчунин ҳалли мушкилот дар раванди муҳоҷират таваҷҷуҳ дорад.
Зимнан зикр гардид, ки дар ҷараёни дидору гуфтушунид ҷонибҳо ҳамчунин атрофи масъалаҳои таъмини амнияту субот дар минтақаи Шарқи Наздику Афғонистон ва роҳандозии муколама миёни тамаддунҳо ва динҳои саросари ҷаҳон табодули назар намудаанд.
