Дар Дафтари Созмони амният ва ҳамкории Аврупо (САҲА) дар Тоҷикистон вохӯрии гурӯҳҳои мақсаднок доир гардид, ки дар кори он намояндагони вазорату кумита, муассисаву ташкилоти дахлдор ширкат варзида, нақшаву барномаҳои худро барои соли 2016-ум таҳия карданд.
Бино ба иттилои сомонаи расмии шабакаи телевизиони «Ҷаҳоннамо», иштирокчиён ба се гурӯҳи корӣ – андозагирии ҳарбӣ-сиёсӣ, андозагирии иқтисодӣ-экологӣ ва андозагирии инсонӣ ҷудо гардида, масъалаҳои дар ин самтҳо ҷойдоштаро матраҳ намуданд.
Гуфта мешавад, гурӯҳи корӣ оид ба андозагирии ҳарбӣ-сиёсӣ масъалаи идоракунии сарҳадҳо ва амният, ислоҳот дар милитсия, мубориза бар зидди терроризм, поксозии минаҳо, ҷанбаҳои сиёсии ҳамкории низомиро мавриди муҳокима қарор дода, гурӯҳи корӣ оид ба андозагирии иқтисодӣ-экологӣ ба масъалаи рушди иқтисодӣ, амнияти энергетикӣ ва бехатарии таъминоти об, мубориза бар зидди коррупсия ва ҷанбаҳои экологии амният мутаваҷҷеҳ ва дар амал татбиқ шудани барномаву лоиҳаҳои бузургро барои Тоҷикистон ва минтақа аҳамиятнок арзёбӣ кард ва гурӯҳи корӣ оид ба андозагирии инсонӣ масъалаи гендерӣ, мубориза бар зидди хариду фурӯши одамон ва ҳуқуқу озодиҳои инсонро баррасӣ намуд.
Зимнан зикр мегардад, ки аз рӯйи натиҷаҳои ин вохӯрӣ Созмони амният ва ҳамкории Аврупо дар Тоҷикистон буҷаи ҷамъбастии худро барои соли 2016 омода намуда, пешниҳодоти баъдиашро оид ба лоиҳаҳо барои соли 2016 ироа хоҳад кард.
