Тӯли 6 моҳи соли равон ба намояндагии Вазорати меҳнат, муҳоҷират ва шуғли аҳолии Тоҷикистон дар Русия 5 ҳазору 220 муроҷиат аз муҳоҷирони корӣ – шаҳрвандони ҷумҳурӣ ворид гардидааст, ки нисбат ба ҳамин давраи соли гузашта 2,5 баробар зиёдтар аст.
Котиби матбуотии намояндагӣ Иброҳим Аҳмадов ба «Азия-Плюс» дар ин робита иттилоъ дод, ки муҳоҷирон ба масъалаҳои гуногун, аз қабили расонидани кумаки ҳуқуқӣ, мусоидат ба ҳаллу фасли баҳсҳо дар робита ба қарордодҳои меҳнатӣ, расонидани кумакҳои моддӣ ва ғайра муроҷиат мекунанд. «Аз ҷумла дар ин давра 199 муроҷиат оид ба бекор кардани қарорҳои мақомоти судӣ дар бораи ихроҷи маъмурӣ ворид шуд», – гуфт ӯ.
Ба қавли номбурда, шумори муроҷиатҳо дар робита ба мусоидат намудан ба ҳалли масъалаи бекор кардани манъи вуруд ба Русия низ афзуда, тибқи маълумоти расмӣ, беш аз 276 ҳазор нафар шаҳрвандони Тоҷикистон дар рӯйхати ба истилоҳ «вурудашон манъ» қарор доранд. «Бо мусоидати намояндагӣ давоми 6 моҳи соли ҷорӣ ба муҳоҷирон дар ҳаҷми умумии 14 млн. 19 ҳазору 482 рубл қарз аз музди меҳнат пардохта шуда, 1297 шаҳрвандони кишвар дар 36 субъектҳои хоҷагидорӣ бо ҷойи корӣ таъмин карда шуданд», – қайд кард. И.Аҳмадов.
Зимнан зикр гардид, ки ҳамчунин бо мусоидати намояндагӣ дар ҳамдастӣ бо фаъолони диаспорахои тоҷикон, соҳибкорон ва ташкилотҳои ҷамъиятӣ ба шаҳрвандони ниёзманди ҷумҳурӣ ба маблағи умумии 2 млн. 610 ҳазору 400 рубл кумаки моддӣ расонида шуд.
