Вазорати корҳои дохилии Тоҷикистон ба
интишори ному насаби ситораҳои эстрадаи тоҷик,
ки чандин маротиба ба қоидаҳои ҳаракат дар роҳҳои пойтахт риоя накардаанд,
идома медиҳад.
Ҳамаи ин қоидавайронкуниҳо дар камераҳои видеойии лоиҳаи «Шаҳри бехатар» сабт шудаанд.
Бино ба маълумоти сомонаи расмии ВКД Тоҷикистон, овозхони эстрада Жанна Шаинян дар автомашинаи шахсии тамғаи «ДЭУ-Ласетти» 54 маротиба ба қоидаҳои ҳаракат дар роҳ риоя накарда, то имрӯз ягон маротиба барои онҳо ҷарима насупоридааст.
Ба истилоҳ ашаддитарин вайронкунандаи қоидаҳои ҳаракат дар роҳ сокини пойтахт Умедҷон Сироҷев мебошад, ки бо «Рэнҷ-Ровер»-и худ ӯ 187 маротиба ба қонуншиканӣ зимни ҳаракат дар роҳ даст зада, ба маблағи умумии 43 ҳазору 830 сомонӣ ҷарима пардохт кардааст.
Дар идомаи рӯйхат сокини дигари пойтахт Ҷамшед Назаров қарор дорад, ки барои 129 маротиба вайрон кардани қоидаҳои ҳаракат дар роҳ бо автомашинаи тамғаи «Лексус-RX350» ба маблағи умумии 33 ҳазору 450 сомонӣ ҷарима супурдааст.
Сокини шаҳри Душанбе Дилшож Ғуломов, ӯ низ бо автомашинаи тамғаи «Лексус-RX350» 129 маротиба ба қонуншиканӣ зимни ҳаракат дар роҳ даст зада, дар маҷмӯъ 29 ҳазору 400 сомонӣ ҷарима пардохт кардааст.
