Нимаи дуюми рӯзи 6 сентябр ширкатҳои алоқаи мобилӣ хизматгузории ирсоли смс-паёмакҳо барои муштариёнро қатъ намуданд.
Барои равшанӣ андохтан ба ин масъала ба «Азия-Плюс» муяссар гардид, ки аз марказҳои хизматгузории ширкатҳои Tcell ва MegaFon маълумот дастрас намояд. Навбатдорони марказҳои ин ширкатҳо дар ин робита иттилоъ доданд, ки мушкилот дар ин самт дарвоқеъ ҳам вуҷуд дорад ва он ба мушкилоти фаннӣ марбут аст, вале ба посух ба саволи боз аз кай дастрас шудани ин хизматгузорӣ маълумоти саҳеҳ дода натавонистанд.
Қобили зикр аст, ки ширкатҳои мобилӣ 10 октябри соли гузашта, замоне, ки дар ҷумҳурӣ дар бораи имкони баргузории гирдиҳамойии эътирозӣ дар Душанбе овозаҳо паҳн шуда буданд, низ ба ин амал даст зада буданд ва ҳамон рӯз баъди тасдиқ нашудани овозаҳо дар бораи гирдиҳамойӣ, дастрасӣ ба ин хизматгузорӣ барқарор шуда буд.
Айни замон дар минтақаи шарқи кишвар амалиёти безарар гардонидани аъзои гурӯҳи генералӣ фирории Вазорати мудофиа Абдуҳалим Назаров идома дорад ва шояд ширкатҳои мобилӣ ба ин хотир ин хизматгузориро қатъ карда бошанд.
