Диаспораҳои тоҷикон дар Русия ва Қазоқистон дар робита ба амалҳои гурӯҳи Ҳоҷӣ Ҳалим, собиқ муовини вазири мудофиаи Тоҷикистон изҳорот пахш намуданд.
Аз ҷумла, ба «Азия-Плюс» изҳороти диаспораи тоҷикон дар шаҳри Санкт-Петербург, ҷамъияти бурунмарзии тоҷикон «Сомон» дар шаҳри Екатеринбург, диаспораи тоҷикон дар Чувашия ва ҳамчунин Асотсиатсияи фарҳангӣ-ҷамъиятии тоҷикони Қазоқистон «Сомониён» дастрас шуд.
Раҳбарияти ҷамъияти «Сомон» аз кӯшишу талошҳои ноҷавонмардона ва бешарафонаи аъзоёни гуруҳои ҷиноятпешаи Назарзода Абдуҳалим Мирзо (Ҳоҷӣ Ҳалим) ва Умаров Чунайдулло (собиқ размандаи Иттиҳоди неруҳои мухолифини тоҷик ва узви ҲНИТ) оид ба муташанниҷ сохтани вазъи сулҳу субот дар Тоҷикистон шадидан нигаронӣ изҳор мекунад.
Дар изҳорот бо таассуф қайд мешавад, ки чунин нобасомониҳо дар давоми рӯзҳое анҷом гирифтанд, ки дар саросари ҷумҳурӣ, аз ҷумла дар Душанбешаҳр ба ифтихори ҷашни 24-солагии Истиқлолияти давлатии Тоҷикистон чорабиниҳо ва ташаббусу тантанаҳои ҷолибу шавқовар барпо гардида, кулли мардум, хусусан насли ҷавони мамлакат аз оромию субот, ваҳдату якпорчагии марзу бум ва иттиҳоди халалнопазир ифтихору сарбаландӣ карда, шукргузорӣ аз созандагӣ ва шукуфоии кишвар менамоянд.
Намояндагони диаспораҳои тоҷики муқими шаҳри Санкт-Петербург амалҳои Ҳоҷӣ Ҳалим ва Ҷунайдулло Умаровро маҳкум намуда, изҳор медоранд, ки «бо ин амал онҳо ба нуфузи Тоҷикистон дар арсаи байналмилалӣ зиён оварданд».
«Гурӯҳҳои террористии болозикр барои ҳаёти осоиштаи халқи точик мушкилиҳо эҷод намуда ва мубориза бо онҳо вазифаи муқаддаси ҳар як шахси равшанфикри Тоҷикистон мебошад», – гуфта мешавад дар изҳорот.
Дар ҳамин ҳол, намояндагони диаспораи тоҷикон дар Ҷумҳурии Чувашияи Русия дар изҳороти худ қайд мекунанд, ки «имрӯзҳо баъзе хоинони миллату Ватан боз бар даст силоҳ гирифтаву бар муқобили бародарону ҳамватанони худ бархостанд, ки ҳар лаҳза пеши назар ҳамон ҳодисаҳои нангину хунини солҳои 90-ум вонамуд мешавад».
«Ин нафарон аз қабили Ҳоҷӣ Ҳалиму дигар ҳаммаслакони собиқи наҳзатиаш боз мехоҳанд, ки халқи тоҷикро ба муқобили ҳам бархезонда миллатро ба вартаи нестӣ баранд. Аммо тавре мегуянд: “кӯр асояшро як маротиба гум мекунад” ва миллати тоҷик низ имрӯз дигар дӯстро аз душман ба хубӣ фарқ мекунад», – омадааст дар изҳорот.
Онҳо аз ҳукумат ва мақомотҳои қудратии Тоҷикистон хоҳиш кардаанд, ки ҳарчи зудтар ин гурӯҳҳои террористиро дастгир намуда, ба фаъолияти ҳамин гуна як ҳизби ба ном исломӣ дар қаламрави ҶТ хотима бахшанд.
Дар ҳамин ҳол, тоҷикони Қазоқистон низ «амали ноҷавонмардонаи Абдуҳалим Назарзода ва ҳаммаслаконаш»-ро маҳкум намуда, даъват мекунанд, ки чунин афрод набояд ифтихори Рӯдакиву Фирдавсӣ, Ибни Сино ва Хоразмиву Берунӣ, Форобиву Умари Хайём ва дигар мутаффакирони барҷастаи тоҷик ва номи милллату ин марзу бумро доғдор кунанд.
«Ин нафар (Абдуҳалим Назарзода), ки аъзои фаъол ва обруманди Ҳизби наҳзати исломии Тоҷикистон буд, вазифа, рутбаи баланди ҳарбӣ, сарвату дороии зиёд дошт, худро ҳоҷӣ ва шахси ботақво меҳисобид, ба осонӣ ба миллату Ватани худ хиёнат намуд. Фикр накард, ки бо ҷинояти содиркардаи худ сабаби рехтани хуни ноҳақи бегуноҳон мегардад ва Ватанро ба харобазор ва макони тохтутози аҷнабиён табдил медиҳад», – зикр мегардад дар изҳорот.
Тоҷикони Қазоқистон аз ҳукумат ва ватандӯстони кишвар даъват мекунанд, ки «дар мубориза ба муқобили душманони миллат ва хоинон қотеъ бошанд, ба ҳаракату ҷараёнҳои ифротӣ ва манфиатҷӯ ба монанди Ҳизби наҳзати ислом иҷозат ва имконияти як руз ҳам идома додани фаъолияти ғаразнокро надиҳанд».
