Ду сокини шаҳри Панҷакент рӯзи 16 октябр дар ағбаи Ҷумон, каме дуртар аз марзи ноҳияи Ургути вилояти Самарқанди кишвари ҳамсояи Ӯзбекистон аз таркиши минаҳои зидди пиёдагард, ки аз ҷониби Ӯзбекистон барои пешгирии убури ғайриқонунии марз гузошта шудаанд, ба ҳалокат расиданд.
Ба гуфтаи котиби матбуотии Сарраёсати нерӯҳои марзбони Тоҷикистон Муҳаммад Улуғхоҷаев, шаҳрвандони Тоҷикистон ғайриқонунӣ ба қаламрави кишвари ҳамсоя ворид шудаанд.
«То ҳол обуҳавои номусоид ва шароити мушкили маҳал имкон намедиҳад, ки ҷасадҳо аз ҷойи ҳодиса бароварда шуда, шахсияти онҳо муайян гардад», – гуфт манбаъ.
Дар ҳамин ҳол, ӯ маълумоти чанде аз ВАО дар бораи бар асари тирпаронии марзбонони ӯзбек ҳалок шудани ду шаҳрванди Тоҷикистон ва боз захмӣ шудани се нафари дигару ба бемористон мунтақил шудани онҳоро қотеъона рад кард.
