Шаҳраки донишҷуёнро, ки дар миёни маҳаллаҳои 19-уму бистум ва 17-уми соҳили рости шаҳри Хуҷанд воқеъ аст, бунёди боз як иншооти таърихию фарҳангии меъморӣ ҳусну таровати бештар хоҳад бахшид.
Бино ба иттилои хадамоти матбуоти раиси вилояти Суғд, бо иқдоми роҳбарияти вилоят дар ин макон маҷмааи меъморию таърихии қаҳрамони халқи тоҷик Темурмалик қомат хоҳад афрохт. Маҷмаа аз пайкараи Темурмалик бо кишти, дарёчаи рамзӣ, чеҳраҳои ҳамсафони муборизи ӯ ва дигар бахшҳои фарҳангию фароғатӣ мураттаб мегардад.
Рӯзи 4 ноябр раиси вилоят Абдураҳмон Қодирӣ ва раиси шаҳри Хуҷанд Раҷаббой Аҳмадзода аз мавзеи иншооти оянда боздид намуда, бо ҷараёни корҳои омодагӣ ва баррасии ҷузъиёти лоиҳа аз наздик шинос шуданд.
Роҳбари вилоят ба масъулини сохтмон, олимону таърихшиносон, меъморон ва аҳли адаб дастур дод, ки ҳангоми амалисозии корҳои лоиҳакашӣ ва тарҳрезӣ хусусиятҳои аслию таърихии замони Темурмаликро ба назар гиранд ва ин макони тамошобоб ибратбахши насли ҷавон бошаду барои кулли шаҳрвандон дастрасу оммавӣ бошад.
