Намояндагони воломақоми мақомоти давлатии Қирғизистон, ИМА, Қазоқистон, Тоҷикистон, Туркманистон, Ӯзбекистон ва Афғонистон дар ҷаласаи Шӯрои Созишномаи қолабӣ оид ба савдо ва сармоягузорӣ миёни кишварҳои Осиёи Марказӣ (ОМ) ва ИМА (TIFA), ки аз 4 то 6 апрели соли ҷорӣ дар Бишкек доир мегардад, иштирок мекунанд.
Бино ба
маълумоти
Вазорати иқтисоди Қирғизистон, дар ҷаласа вазъи муҳити савдо ва сармоягузорӣ дар минтақаи Осиёи Марказӣ, аз ҷумла масоили марбут ба сармоягузориҳо, содда гардонидани расмиёти савдо миёни кишварҳои иштирокчии TIFA, дастрасии молу маҳсулоти кишварҳои иштирокчии Созишнома мутобиқи Низоми генералии имтиёзоти ИМА барои кишварҳои дар ҳоли рушд қарордошта ва ҳамчунин густариши имконоти иқтисодии занон ва мусоидат ба соҳибкори миёни занон баррасӣ мешавад.
«Гурӯҳҳои корӣ оид ба масъалаҳои гумрук, меъёрҳо, тадбирҳои санитарӣ ва фитосанитарӣ аз пешрафти ҳосилшуда дар ин самтҳо натиҷагирӣ ва вазифаҳо дар соли минбаъдаро тарҳрезӣ менамоянд», – омадааст дар маълумот.
Дар Созишномаи TIFA таҳкими муносибатҳои тиҷоратӣ ва сармоягузорӣ миёни ИМА ва панҷ кишвари Осиёи Марказӣ – Қирғизистон, Қазоқистон, Тоҷикистон, Туркманистон, Ӯзбекистон (Афғонистон мақоми нозирро дорад) пешбинӣ шудааст. Созишнома ба роҳандозии робитаҳои тиҷоратӣ ва сармоягузорӣ ҳам бо ИМА ва ҳам байни кишварҳои минтақа нигаронида шудааст.
