Баъд аз обхезиҳо ва селобаҳое, ки дар нӯҳ ноҳияи Тоҷикистон 9-12 майи соли 2016 ба вуқӯъ пайваста зарар оварданд, Комиссияи Аврупо ҷиҳати расонидани кӯмаки башардӯстона ба онҳое, ки аз ҳама беш зарар дидаанд, 60 000 евроро ҷудо намудааст.
Боронҳои шадиде дар Тоҷикистон боиси марги 5 нафар, бепаноҳу бехӯрок мондани 1500 оила, зарари инфрасохтори муҳими заминҳои киштӣ ва талафи чорво гардидааст.
Саридораи Комиссияи Аврупо оид ба кӯмакҳои башардӯстона ва ҳимояи авом “ECHO” ҷавобан ба илтимоси Федератсияи Байналмилалии Салиби Сурх ва Ҳилоли Аҳмар (ФБСС) оиди расонидани ёрии таъҷилӣ, барои фонди ҳолатҳои фавқулодаи ин созмон маблағ ҷудо карда дод. Қарори мазкур дар асоси баҳодиҳии дақиқ, ки дар ҳамкорӣ бо шарикони зайл: “Дастаи баҳодиҳии фаврӣ ва ҳамоҳангии амалиёт дар ҳолатҳои фавқулода” ба истилоҳ “РЕАКТ”; мақомоти давлатии Тоҷикистон оид ба ҳолатҳои фавқулода; ва созмонҳои байналмилалии муқими Тоҷикистон; гузаронида шуда буд, қабул шуд.
Маблағи мазкур ба Ҷамъияти Ҳилоли Аҳмари Тоҷикистон дастрас карда шуд то ин созмон ба 320 аз ҳама беш оилаҳои зарардида бо молҳои ғайрихӯрокӣ, аз ҷумла кӯрпачаҳо, рахти хоб, кампалҳо, болишту бастачаҳои беҳдоштӣ таъмин намояд.
Тоҷикистон кишвари кӯҳистонӣ буда, дар муқобили офатҳои табиӣ чун селу ярчу обхезӣ, ки қариб ҳар сол инҷо зарба мезананд, хеле осебпазир аст. Тавассути барномаи омодагӣ ба офатҳои табиӣ бо номи “DIPECHO”, Комиссияи Аврупо беш аз 10 сол ин ҷониб дар Тоҷикистон талош дорад, ки қудрати ҷамоатҳои маҳалиро дар муқобили офатҳои табиӣ пурзуртар гардонад.
Замина
Иттиҳоди Аврупо якҷоя бо давлатҳои аъзояш донори бузургтарини дунё дар ҷодаи кӯмаки башардӯстона ба шумор меравад. Кӯмаки ИА ин як изҳори муттафиқии Аврупо бо мардуми ниёзманд дар саросари ҷаҳон аст. Ҳадафи кӯмаки ИА ин наҷот додани ҳаёт, пешгирӣ ва таскини дарду азоби инсон, ҳифзи нангу номуси мардуме, ки аз офатҳои табиӣ ва ё бӯҳронҳои одамсохт зарар диданд. Ҳар сол Комиссияи Аврупо тавассути Раёсати кӯмакҳои башардӯстона ва ҳифзи шаҳрвандӣ (ECHO) ба беш аз 120 миллион қурбониёни офатҳои табиӣ ва ҷангҳо кӯмак мерасонад. Барои маълумоти иловагӣ метавонед сомонаи ECHO-ро боздид намоед.
Байни Комиссияи Аврупо ва ФБСС созишномаи тафвиз ба имзо расид, ки тибқи он ба фонди ҳолатҳои фавқулодаи ФБСС 3 миллион евро гузаронида мешавад. Маблағи фонди мазкур асосан барои рафъи оқибатҳои офатҳои “хурд” истифода бурда мешавад. Одатан ингуна офатҳои хурд муроҷиати расмии ҳукуматҳоро ба ҷомеаи ҷаҳонӣ наметалабад.
Фонди ҳолатҳои фавқулода соли 1985 таъсис ёфта, аз ҳисоби маблағҳои донорҳо пур мегардад. Ҳар боре, ки барои вокуниш ба офати табиӣ ягон Ҷамъияти миллии Салиби Сурх ва ё Ҳилоли Аҳмар ба таври таъҷилӣ маблағ гирифтанӣ шавад, он метавонад маблағҳои заруриро аз фонди мазкур дархост намояд.
Ҷиҳати рафъи оқибатҳои офатҳои хурд, ФБСС аз фонди мазкур маблағи заруриро ҷудо мекунад ва баъдан донорҳо ин фондро боз пур мекунанд. Созишномаи тафвизе, ки байни ФБСС ва ECHO ба имзо расидааст, ба ECHO имкон медиҳад, ки фонди ҳолатҳои фавқулодаро умуман то 3 миллион евро пур карда, ба ҳамоҳангии кӯмакрасониҳо мусоидат намояд (ин ба оинномаи ин созмон оиди кӯмакрасонии башардӯстона мувофиқ аст.
