Муовини нахуствазири Тоҷикистон Азим Иброҳим ҷаласаи ситоди корӣ оид ба омода кардани шабакаҳои гармидиҳии шаҳри Душанбе ба мавсими зимистонро баргузор намуд.
Тавре як манбаъ аз ҳукумати ҷумҳурӣ дар ин робита иттилоъ дод, муовини нахуствазир қайд кардааст, ки бо дастури президенти мамлакат ҳукумат азнавсозӣ ва барқарор кардани шабакаҳои гармидиҳии Душанберо ба нақша гирифтааст, ки қисмате аз онҳо тайи солҳо охир умуман кор намекарданд.
Тибқи нақшаи ҳукумат, барои насби шоҳқубури гармидиҳӣ аз «МБГ Душанбе-2» то «Автовокзали»-и ш. Душанбе, ки дарозиаш 6,1 км мебошад, корҳои сохтмонӣ аллакай оғоз гардидаанд. Бо ин мақсад аз Чин 11 ҳазору 508 метр қубурҳои гуногунқутр ворид гардидааст.
Маркази барқу гармидиҳии Душанбе-2 барои истеҳсоли нерӯи барқ ва гармӣ пешбинӣ шуда, гармкунии об дар лоиҳаи сохтмони ин иншоот вуҷуд надорад.
Иқтидори истеҳсолии МБГ Душанбе-2 300 МВт нерӯи барқ ва 167 ГК гармиро ташкил медиҳад. Иншоот бо ангишт кор мекунад. Дар он таҷҳизоте насб хоҳад шуд, ки дар сурати зарурат корхона метавонад ба истифодаи газ ба сифати сӯзишворӣ гузарад.
Барои фаъолияти мунтазами МБГ дар мавсими гармидиҳӣ дар мавзеи Лучоб анбори захираи ангишт сохта мешавад, ки ғунҷоиши он 700 ҳазор тоннаро ташкил медиҳад.
