Марзбонони тоҷик аз кӯшиши навбатии убури ғайриқонунии марз ва қочоқи маводи мухаддир ба ҷумҳурӣ тариқи дидбонгоҳҳои сарҳадии «Панҷ» ва «Шӯрообод» ҷилавгирӣ намуданд.
Тавре сардори Сарраёсати Қушӯнҳои сарҳадии КДАМ Тоҷикистон Муҳаммад Улуғхоҷаев иттилоъ дод, як гурӯҳи номаълуми иборат аз 8 нафар қочоқбарон зимни убури ғайриқонунии қитъаи сарҳади давлатӣ ба марзбонон дучор мешаванд.
«Марзшиканон ба талаботи сарҳадбонон риоя накарда, миёни онҳо задухӯрди мусаллаҳона сурат мегирад, ки дар натиҷа 2 тан аз қочоқбарон захмӣ ва боқимонда бо истифода аз торикии шаб дар қаламрави кишвари ҳамсоя паноҳ мебаранд», – гуфт манбаъ.
Зимнан зикр гардид, ки дар ҷойи ҳодиса беш аз 14 кило маводи мухаддири ҳашиш, тақрибан 40 кило бангдона, 2 адад автомати АКС-74 бо тирдонҳояшон ва беш аз 50 дона тирҳои ҷангӣ дарёфт шуда, айни замон мақомоти тафтишоти Раёсати КДАМ дар вилояти Хатлон ба таҳқиқи ин ҳодиса машғул аст.
