Васоити ахбори умуми Ҳиндустон доир ба боздошти як зани зодаи Тоҷикистон, сокини шаҳри Душанбе ба гумони қочоқи тилло
хабар медиҳанд
. Ӯ дар фурудгоҳи шаҳри Деҳлӣ бо 2,7 кило тилло боздошт шудааст.
«Мусофирзан аз Душанбе тиллоро дар сумкаи дастиаш оварда, он ҳангоми азназаргузаронии бағочи дастӣ дарёфт шуд. Тилло бо вазни 2,7 кило мусодира ва зан ба ҳабс гирифта шуда, сафорати Тоҷикистон дар Ҳиндустон аз ин ҳодиса огоҳ карда шуд», – қайд мешавад дар хабарҳои ВАО.
Дар ҳамин ҳол,
Радиои Озодӣ
бо истинод ба сафири Тоҷикистон дар Ҳиндустон Мирзошариф Ҷалолов дар ин робита менависад, Мастура Сафароваи 46-сола, сокини шаҳри Душанбе рӯзи ҷумъа, 15 июл, тавассути ҳавопаймои ширкати ТоҷикЭйр аз Душанбе вориди Деҳлӣ шуд. Кормандони гумруки фурудгоҳи ба номи Индира Гандӣ ҳангоми тафтиши сумкаи дасти ӯ тақрибан ду кило тиллои хомро ошкор ва мусодира карданд.
Сафир ҳамчунин гуфтааст, ҳангоми мусодираи тилло ва таҳияи аснод масъули бахши консулии сафорат Фурқат Саидов дар фурудгоҳ ҳузур доштааст.
Гуфта мешавад, сафири илова намудааст, ки Мастура Сафарова айни ҳол дар боздоштгоҳ қарор дошта, вале шояд баъд аз як-ду рӯз озод карда шавад, зеро тибқи қонунгузории Ҳиндустон, афроде, ки барои қочоқи миқдори на он қадар бузурги тилло боздошт мешаванд, мавриди муҳокимаи додгоҳӣ қарор намегиранд ва пас аз пардохти ҷарима раҳо мешаванд ва ҳатто ҳақ доранд, ки то рӯзи хатми раводидашон дар кишвар бимонад, лекин тиллои мусодирашуда бо ҳукми додгоҳ моликияти давлат эълон мешавад.
