Дар остонаи таҷлили ҷашни 25-умин солгарди Истиқлолияти давлатии кишвар КВД “Роҳи оҳани Тоҷикистон” аз Қазоқистон локомотиви муосири магистралӣ харидорӣ кард.
Бино ба иттилои дафтари матбуоти идораи роҳи оҳан, ин локомотив бо таҷҳизоти барқӣ муҷаҳҳаз буда, нисбатан камтар сӯзишворӣ харҷ мекунад ва панҷумин локомотиве аст, ки тайи солҳои ахир аз Қазоқистон дастрас шудааст.
Гуфта мешавад, ғайр аз ин, аз Эстония низ қатораи дизелӣ харидорӣ шудааст, ки бо муҳаррик (двигатель)-и истеҳсоли Олмон муҷаҳҳаз буда, аз 6 вагон иборат аст ва дар 1 километр ҳамагӣ 1,5 литр сӯзишворӣ масраф менамояд. Ду вагони қатораи дизелӣ 68 ҷойи нишаст, 3 вагон – 128 ҷойи нишаст ва 1 вагон – 48 ҷойи нишаст барои мусофирон доранд.
