Чорабиниҳои ҷашнӣ ба муносибати 25-умин солгарди Истиқлолияти давлатии Тоҷикистон дар шаҳри Душанбе аз субҳи имрӯз оғоз гардида, 8 сентябр дар майдони «Дӯстӣ»-и пойтахт бо иштироки 16 ҳазор нафар сарбозону афсарони гарнизони Душанбе гузашти низомӣ доир мегардад.
Рӯзона дар маҷмааи «Кохи Борбад» бо иштироки аъзои ҳукумат, вакилони парлумон, кормандони корпусҳои дипломатии муқими Душанбе ва намояндагони аҳли ҷомеа таҳти раёсати президенти мамлакат Эмомалӣ Раҳмон ҷамъомади тантанавӣ баргузор мешавад. Дар анҷоми ҷамъомад консерти идона доир мегардад.
Шомгоҳон дар Варзишгоҳи марказии ҷумҳуриявӣ намоишгоҳи театрикунонидашуда барпо мешавад, ки 1,5 соат идома ёфта, бо мушакпарронӣ (фейерверк) ба итмом мерасад.
Рӯзи 9 сентябр ба муносибати ҷашни Истиқлолият сайругашти оммавии сокинони шаҳр доир гардида, дар он иштироки ҳудуди 60 ҳазор нафар шаҳрвандони ҷумҳурӣ дар назар аст. Иштирокчиёни раҳпаймоии идона субҳи рӯзи 9 сентябр аз майдони “Дӯстӣ” гузашта, онҳоро раҳбарияти олии кишвар шодбош хоҳад гуфт.
Рӯзи 10 сентябр дар маҷмааи “Наврӯзгоҳ” иди оши палав баргузор шуда, ошпази беҳтарини ин таъом муайян карда мешавад. Дар ин чорабинӣ низ иштироки раҳбарияти кишвар пешбинӣ шудааст.
Санаи 11 сентябр президенти мамлдакат Эмомалӣ Раҳмон ҷиҳати иштирок дар чорабиниҳои ҷашнӣ ба вилояти Суғд раҳсипор мегардад.
Қобили зикр аст, ки дар робита ба ҷашни 25-солагии Истиқлолият ва Иди Қурбон шаҳрвандони Тоҷикистон муддати 4 рӯз – аз 9 то 12 сентябр истироҳат мекунанд.
