Палатаи поёнии парлумони Тоҷикистон лоиҳаи қонун «Дар бораи таҳсилоти калонсолон»-ро тасдиқ кард, ки мутобиқи он минбаъд дар ҷумҳурӣ ба шахсоне, ки бидуни таҳсил дар омӯзишгоҳҳои касбӣ ё коллеҷҳо мустақилона ин ё он касбро азхуд кардаанд, дар бораи омодагии касбиашон шаҳодатнома дода мешавад.
Таҳиягари лоиҳаи қонуни мазкур вакил Нурулло Оқилзода мутмаин аст, ки қабули ин қонун ба таъмини ҳазорон нафар шаҳрвандони ҷумҳурӣ дар дохил ва хориҷи кишвар мусоидат мекунад.
Раиси Маҷлиси намояндагон Шукурҷон Зуҳуров дар ин робита изҳор намуд, ки беш аз 70%-и муҳоҷирони кории тоҷик дар Русия расман ҳеҷ маълумот дар бораи тасдиқи касб надоранд, вале аксари онҳо касбҳои бинокор, устои таъмигари автомашинаҳо, сартарош ва ғайраро азхуд кардаанд.
Вазири меҳнат, муҳоҷират ва шуғли аҳолии ҷумҳурӣ Сумангул Тағойзода қайд кард, ки имрӯз шумори аҳолии коршоями кишвар ҳудуди 5 млн. нафарро ташкил дода, наздики 2,5 млн. нафари тоҷикистониён дар дохил ва хориҷи кишвар машғули коранд ва ба ин шумор ҳамчнин муҳоҷирони корӣ низ шомиланд.
