Раиси шаҳри Душанбе дар бораи даъвати иҷлосияи нуҳуми ғайринавбатии Маҷлиси вакилони халқи шаҳри Душанбе санаи 7 феврал қарор ба имзо расонид.
Бино ба маълумоти дафтари матбуоти мақомоти шаҳрдории пойтахт, масъалаи асосии мавриди баррасии ҷаласа рафти омодагии шаҳри Душанбе ба ҷашни Наврӯз буда, дар ин хусус ҳисоботи муовини аввали раиси шаҳр Маҳмадсаид Зувайдзода шунида мешавад.
Гуфта мешавад, ахири ҳафтаи сипаришуда раиси пойтахт аз Корхонаи коммуналии воҳиди давлатии "Троллейбус" боздид намуда, ба масъалаи вазъи кунунии парки мошину олотҳои корхона ва истифодаи самараноки воситаҳои нақлиётии мусофирбар, бахусус троллейбусҳо мароқ зоҳир кард.
Гуфта мешавад, таъкид гардидааст, ки фаъолияти имрӯзаи троллейбусҳо дар шаҳр чандон ҷавобгӯи талаботи мусофирон набуда, беҳбудии ҷиддиро талаб мекунад.
Дар ин зимн хотиррасон мебояд кард, ки бо дархости раҳбарияти нави шаҳрдории Душанбе Агентии зиддифасоди ҷумҳурӣ соли ҷорӣ ҷараёни амалисозии лоиҳаи «Манзили дастрас»-ро ғайринақшавӣ мавриди санҷиш қарор медиҳад. Ин лоиҳа бо дастгирии мақомоти шаҳрдорӣ ҳанӯз соли 2013 оғоз гардида буд.
Ба гуфтаи муовини раиси Агентии зиддифасод Абдукарим Зарифзода, санҷиши нақшавии фаъолияти молиявӣ ва хоҷагидории шаҳрдории Душанбе соли 2016 гузаронида шуда, санҷиши навбатӣ соли 2018 ба нақша гирифта шуда буд.
Дар лоиҳаи «Манзили дастрас» таъмини як доираи муайяни сокинони пойтахт, аз ҷумла зиёиён бо манзилҳои нисбатан арзон дар хонаҳои баландошёна, ки дар маҳаллаи «Профсоюз» сохта мешаванд, пешбинӣ мешавад. Тибқи нақша, моҳи сентябри соли 2015 манзилҳои аввал дар доираи ин лоиҳа бояд ба истифода дода мешуданд, вале сохтмони онҳо то ба ҳол ба итмом нарасидааст.
