Журналистони Тоҷикистон донишу малакаи худро дар ҷараёни давраи омӯзишию амалии серӯза таҳти унвони «Инъикоси масоили ғизо дар воситаҳои ахбори омма» такмил доданд.
Иштирок дар ин чорабинӣ, ки рӯзҳои 27-29 июл дар толори осоишгоҳи «Сароб» (Хоҷа Оби Гарм) баргузор шуд, барои таҳияи минбаъдаи матолиби касбӣ оид ба ташаббусҳои амалишаванда дар доираи ҳаракати глобалии Густариши чорабиниҳои ғизоӣ (Scaling Up Nutrition), аҳамияти ғизои хушсифат дар тӯли 1000 рӯзи аввали ҳаёт, инчунин ғанигардонии орд бо микронутриентҳои зарурӣ баҳри беҳтар кардани саломатии мардуми Тоҷикистон мусоидат мекунад.
ИЗОБРАЖЕНИЕ Суханронии Умед Давлатзод, Муовини вазири рушди иқтисод ва савдои ҶТ оид ба тадбирҳои амалишаванда ҷиҳати таъмини амнияти озуқаворӣ ва дастрасии аҳолӣ ба ғизои хушсифат.
Дар ин давраи омӯзишию амалӣ, ки бо дастгирии Оҷонсии ИМА оид ба рушди байнулмилалӣ (USAID) аз ҷониби Мактаби мустақили рӯзноманигории «Тоҷикистон – асри XXI», Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва Алянси глобалӣ барои беҳдошти ғизо (GAIN) гузаронида шуд, 21 нафар журналистони шабакаҳои телевизионӣ ва радиоӣ, нашрияву маҷаллаҳо ва хабаргузориҳо аз тамоми минтақаҳои кишвар ширкат варзиданд.
Норасоии микроэлементҳои ғизоӣ дар Тоҷикистон мушкили ҷиддӣ ба ҳисоб меравад. Пажӯҳиши соли 2016 муайян кардааст, ки 22 дарсади занони синни репродуктивӣ ва 26 дарсади кӯдакони то панҷсола аз камхунии сабабаш норасоии оҳан азият мекашанд. Ҳолати мазкур ва дигар намудҳои норасоии микроэлементҳои ғизоӣ, аз ҷумла, нуқсонҳои модарзодие, ки аз норасоии туршии фолат пайдо мешаванд, пайомадҳои дарозмуддат барои солимии аҳолӣ ва пешрафти иқтисодиёти кишвар доранд.
Дар ҷараёни ин давраи омӯзишию амалӣ Муовини вазири рушди иқтисод ва савдои Ҷумҳурии Тоҷикистон Умед Давлатзод, вакилони Маҷлиси намояндагони Маҷлиси Олии Ҷумҳурии Тоҷикистон Ҷамшед Муртазоқулов ва Гулбаҳор Ашурзода, намояндагони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Шералӣ Раҳматуллоев ва Пирназар Шодмонов, инчунин коршиносони миллӣ ва байнулмилалӣ дар бахши ғизо суханронӣ карданд.
ИЗОБРАЖЕНИЕ
Бо мусоидати лоиҳаи USAID «Кӯмаки техникӣ барои коҳиши норасоии микронутриентҳо дар Тоҷикистон», рӯзноманигорон донишу малакаи худро дар самти таҳияи матолиби телевизионӣ, радиоӣ, чопӣ ва онлайнии чандрасонаӣ оид ба аҳамияти ғизои хушсифат барои сиҳатии мардум ва рушди иқтисодӣ такмил доданд.
Дар давоми 25 соли охир Сафорати ИМА дар Душанбе беш аз 1.8 миллиард доллари ИМА-ро барои барномаҳои мухталиф оид ба таҳкими амният, ниҳодҳои демократӣ, бахши иҷтимоӣ ва рушди иқтисодии Тоҷикистон равона кардааст. Дар давоми соли 2017 Ҷумҳурии Тоҷикистон ва Иёлоти Муттаҳидаи Амрико 25-умин солгарди истиқрори муносибатҳои дипломатиро ҷашн гирифтанд.
