Бар асари чаппа шудани автомашина дар қаламрави ноҳияи Хуросон 3 нафар ба ҳалокат расиданд.
Бино ба иттилои дафтар матбуоти ВКД Тоҷикистон, рӯзи 16 август ронандаи автомашинаи тамғаи “Опел-Астра” Маҳмадзоир Раҳимови 39-сола, сокини ноҳияи Шаҳритус, ҳангоми ҳаракат аз Шаҳритус ба Душанбе, аз уҳдаи идораи воситаи нақлиёт набаромада, автомашина дар канори роҳ чаппа шудааст.
Гуфта мешавад, дар натиҷа мусофирони автомашинаи мазкур – зани 53-сола, навраси 17-сола ва марди 40-сола, ҳамаашон сокинони вилояти Хатлон ҳалок шудаанд.
Зикр мегардад, ки як рӯз пеш дар роҳи мошингарди Ашт – Хуҷанд низ бар асари садамаи нақлиёт 3 нафар ба ҳалокат расиданд.
Тибқи маълумоти ВКД, ронандаи автомашинаи тамғаи “Шатман” Абдуҳалим Муъминови 29-сола ҳангоми ҳаракат бо роҳи нақлиётгарди Ашт-Хуҷанд дар километри 48-уми ҳудуди ҷамоати деҳоти Д.Холматов бехатарии ҳаракати роҳро таъмин карда натавониста, ба автомашинаи тамғаи “Хундай Портер”, таҳти идораи ронанда, Зарифҷон Ибрагимови 37-сола бармехӯрад.
Дар натиҷа худи ронандаи автомашинаи тамғаи “Хундай Портер” Ибрагимов З. ва мусофирони дохили автомашина – Қумрӣ Иброҳимоваи 67-сола ва писари 13-солаи ронанда Шодовар Ибрагимов дар ҷойи ҳодиса ба ҳалокат расидаанд.
Тибқи маълумоти ВКД Тоҷикистон, аз оғози соли равон дар роҳҳои мошингарди ҷумҳурӣ 591 ҳодисаи садамаи нақлиёт ба қайд гирифта шуда, бар асари онҳо 194 нафар ҳалок ва 623 нафар ҷароҳатҳо бардоштаанд.
