Вазорати корҳои дохилии Тоҷикистон 5 нафар донишҷӯёнеро ошкор кард, ки бо автомашинаи шахсиашон ба дарс ҳозир шуда буданд. Тибқи қонун, ба онҳо хориҷшавӣ аз мактабҳои олӣ таҳдид мекунад.
Бино ба иттилои дафтари матбуоти ВКД Тоҷикистон, ин рейд давоми рӯзҳои 16-19 сентяьбр гузаронида шудааст.
Дар рӯйхати қонуншиканон Ёсир Мирзоев, донишҷӯи бахши 3-юми Донишгоҳи миллии Тоҷикистон (автомашинаи Тойота-Кемри), Қурбоналӣ Кенҷаев, донишҷӯи бахши 4-уми Донишгоҳи давлатии омӯзгории Тоҷикистон (ДЭУ-Нексия), Иқболшо Бобохонов, Донишҷӯи бахши 3-юми Донишгоҳи давлатии тиҷоратии Тоҷикистон (Мерседес-Бенс), ҳамкурси ӯ Кишвар Қандов (Опел-Астра) ва Асланҷони Ганҷалзода, донишҷӯи бахши 2-юми Коллеҷи информатика ва техникаи компютерии шаҳри Душанбе (Опел-Астра) ҳузур доранд.
Ёдрас мекунем, ки дар Тоҷикистон ба хонандагони мактаб ва донишҷӯёни мактабҳои олӣ ва омӯзишгоҳҳои касбӣ-техникӣ ба дарс бо автомашинаи шахсӣ омадан қатъиян манъ аст. Чунин тағйирот ба қонунгузориро парлумон тобистони ҳамин сол қабул кард.
Он замон зимни шарҳи тағйиру иловаҳо ба ин қонун дар парлумон вазири маориф ва илми Тоҷикистон Нуриддин Саид ба вакилон изҳор намуд, ки барои чунин қонуншиканӣ донишҷӯён аз макотиби олӣ ба муҳлати се сол ва толибилмони коллеҷу омӯзишгоҳҳои касбӣ-техникӣ ва мактабҳо ба муддати як сол аз муассисаҳо хориҷ карда мешаванд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
