Дар вилояти Суғд як нафаре боздошт шуд, ки худро муовини сардори Раёсати Агентии назорати давлатии молиявӣ ва мубориза бо коррупсияи Тоҷикистон дар вилояти Суғд муаррифӣ карда, хоҳиши бепул аз муоинаи тиббӣ гузаштанро доштааст.
Бино ба иттилои дафтари матбуоти Агентӣ, намояндаи ширкати «Диамед» дар вилояти Суғд доир ба ин масъала ба Раёсати Агентӣ муроҷиат кардааст.
Гуфта мешавад, ба маркази ташхис шаҳрванд Шарипов Раҳим Муҳаммадович муроҷиат карда гуфтааст, ки муовини роҳбари Раёсати Агентии зиддифасод дар Суғд аст ва талаб кардааст, ки ташхиси ӯро бепул гузаронанд, вагарна бо истифода аз ваколатҳои мансабиаш, дар фаъолияти онҳо мушкилӣ эҷод мекунад.
«Дар рафти гузаронидани чорабиниҳои оперативӣ-тафтишотӣ Шарипов Раҳим Муҳаммадович дар бинои ташхисгоҳи мазкур боздошт шуда, ба Раёсати Агентӣ оварда шуд, – омадааст дар маълумоти Агентӣ. – Ҳангоми гузаронидани таҳқиқ номбурда ба корманди Агентӣ, ки шахси мансабдор мебошад барои ҳал намудани натиҷаи санҷиш ба фоидаи ӯ ва раҳо ёфтан аз ҷавобгарӣ, ба сифати пора 1358 сомонии бо худ доштаро пешниҳод намудааст».
Зимнан зикр мегардад, ки вобаста ба ҳолатҳои дар боло зикградида нисбати Шарипов Раҳим Муҳаммадович бо моддаҳои 320 қисми 1 ва 247 қисми 1 КҶ Ҷумҳурии Тоҷикистон парвандаи ҷиноятӣ оғоз карда шуда, тафтиши пешакии он идома дорад.
