Саид Қиёмиддини Ғозӣ, ки замони ҷанги шаҳрвандӣ дар майдони Шаҳидон бо номи «генерали мардумӣ» маъруф буд, дар тавқифгоҳи муваққатӣ (СИЗО)-и шаҳри Хуҷанд нест.
Тавре ба «Азия-Плюс» як манбаъ аз мақомоти ҳифзи ҳуқуқи вилояти Суғд дар ин робита хабар дод, «ӯ ба фурудгоҳи шаҳри Хуҷанд наомадааст».
«Агар чунин мебуд, ҳама аз он хабардор мешуданд, – иброз дошт манбаъ. – Ғайр аз ин, ӯро хадамоти махсус дарҳол боздошт ва ба Душанбе мефиристоданд».
Тавре ба «Азия-Плюс» аз сарчашмаҳои айрирасмӣ дар мақомоти ҳифзи ҳуқуқ маълум шуд, Саид Қиёмиддини Ғозӣ дар Душанбе ҳам набудааст.
Рӯзи 22 ноябр Радиои Озодӣ дар ин робита иттилоъ дод, ки «генерали мардумӣ» Саид Қиёмиддини Ғозӣ дар шаҳри Санкт-Петербург бедарак шуда, аллакай дар Тоҷикистон қарор дорад.
«Бори охир шаби 20 ба 21-уми ноябр тахминан соатҳои 12-и шаб ба вақти Санкт-Петербург аз фурудгоҳ ба писараш Баракатуллоҳ, ки дар Русия зиндагӣ мекунад, занг зада, гуфтааст, “маро ба Тоҷикистон ихроҷ карданд», – гуфтааст Раҷабгул Мусулмонова, ҳамсари Саидқиёмиддини Ғозӣ.
Онҳо фаҳмидаанд, ки ӯро ба Хуҷанд мебаранд ва вақте ба умеди пешвози ӯ ба фурудгоҳ рафтаанд, ҳамаи мусофирон берун шуда, вале Саидқиёмиддин Ғозиро надидаанд. Тибқи иттилое, ки фарзандон дар фурудгоҳи Хуҷанд дарёфтаанд, вазъи саломати Қиёмиддин Ғозиев дар ҳавопаймо бад шуда, ӯро аз фурудгоҳ тавассути мошини “Ёрии таъҷилӣ” ба назди пизишк бурдаанд.
Радиои Озодӣ бо истинод ба як пойгоҳи мухолифини тоҷик дар хориҷ – вебсайти “Паём” менависад, Қиёмиддин Ғозиев замоне ки тариқи Истанбул аз Эрон ба Русия бармегашт, аз ҷониби неруҳои амниятии Русия дар шаҳри Санкт-Петербург боздошт шуда, ба Тоҷикистон истирдод шудааст.
Ҳамсараш изҳор намудааст, ки шавҳараш дар шаҳри Санкт-Петербург ҳамроҳ бо фарзандон қаҳвахона дошт ва онҷо кор мекард. Аз эҳтимоли боздошт шудани ҳамсараш дар ҳайрат ва ташвиш аст, мегӯяд, ҳеҷ аломати онро надорад, ки ҳамсараш ҷустуҷӯ мешуд. “Кадом гуноҳе накарда буд ва мавриди шубҳа қарор надошт. Боре ҳам ба хонаи мо ҳеч намояндаи мақомот сар назадааст”, – гуфтааст ӯ.
Қиёмиддин Ғозиев ё Эшони Саид Қиёмиддини Ғозӣ аз руҳониёни шинохтаи солҳои 90-ум ва яке аз иштирокдорони фаъоли майдони “Шаҳидон” дар Душанбе буд. Дар қатори чанд иштирокдори майдони “Шаҳидон” ба ӯ унвони “генерали мардумӣ”-ро дода буданд.
Солҳои ҷанги шаҳрвандии Тоҷикистон ба Афғонистон гуреза шуда, дар ҳайати Иттиҳоди нерӯҳои мухолифини тоҷик фаъолият кард. Бо имзои Созишномаи сулҳ Қиёмиддин Ғозиев ба ватан баргашта, узви зеркомиссияи ҳуқуқии Комиссияи Оштии Миллӣ буд. То қатъи фаъолияти Комиссияи оштии миллӣ дар ин вазифа кор кард ва барои хидматаш дар татбиқи созишномаи сулҳ аз Ҳукумати Тоҷикистон бо ордени “Шараф” қадрдонӣ шудааст.
