Фармондеҳи дидбонгоҳи сарҳадии «Дарвоз»-и Қушунҳои сарҳадии КДАМ Тоҷикистон, ки охири моҳи август дар ин қисми низомӣ сарбози хизмати ҳатмии ҳарбӣ прапоршик ва се тобеъони ӯро гаравгон гирифта буд, муваққатан аз мақомаш барканор шудааст.
Тавре ба «Азия-Плюс» як манбаъ аз Сарраёсати Қушунҳои сарҳадии КДАМ Тоҷикистон дар ин робита хабар дод, тафтиши ҳодисаи рӯзи 25 август рухдода дар қаламрави дидбонгоҳи зикршуда идома дорад. Қаблан зикр гардида буд, ки дар прокуратураи ҳарбии гарнизони Хоруғ ба ин парванда "мӯҳри махфӣ" зада шудааст.
«Агар дар ҷараёни тафтиши судии ҳодисаи мазкур риоя нашудани меъёрҳои қонунгузорӣ аз ҷониби фармондеҳи дидбонгоҳ ва се тан аз тобеъони ӯ ошкор гардад, онҳо аз мақомашон барканор ва ба ҷавобгарӣ, то ҷавобгарии ҷиноӣ кашида мешаванд», – иброз дошт манбаъ.
Дар ҳамин ҳол, Идибек Хонов, падари ин сарбоз рӯзи 27-уми ноябр ба Радиои Озодӣ гуфтааст, ки пас аз кушта шудани писараш ба Бадахшон сафар кард ва мақомот барояш гуфтанд, ки парвандаро одилона таҳқиқ мекунанд.
«Бароям гуфтанд, нафароне, ки писаратро ба чунин ҳол овардааст, маълум шуданд. Дигар ҷони писари маро баргардонида намешавад, вале ба хотири пешгирӣ аз чунин ҳодисаҳо бояд ин кор то охир тафтиш шавад. Баъди ҳодисаи писари ман тамоми қисмҳои низомӣ тафтиш шуд», – изҳор доштааст падари сарбоз.
Ёдрас мекунем, ки сарбози қисми ҳарбии сарҳадбонӣ Сафарбек Хонов рӯзи 25-уми августи соли равон пас аз тақрибан се соати гаравгонгирии як “прапоршик”-и қисми низомӣ дар ҳудуди деҳаи Вишхарви ноҳияи Дарвози вилояти Бадахшон кушта ё ба истилоҳи тафтишот безарар гардонда шудааст.
