Иҷлосияи Маҷлиси миллии Маҷлиси Олии Тоҷикистон, ки оғозаш субҳи имрӯз пешбинӣ шуда буд, нимаи дуюми рӯз баргузор мешавад.
Субҳи имрӯз ба ҷойи иҷлосияи 14-уми пешбинишудаи палатаи болоии парлумон Президенти Тоҷикистон, раиси Ҳизби халқии демократии Тоҷикистон (ҲХДТ) Эмомалӣ Раҳмон дар қароргоҳи шаҳрии ҳукумат ҷаласаи навбатии ин ҳизбро баргузор мекунад.
Дар пленум, ки бо иштироки раҳбарияти ҳизб, раисони шаҳру навоҳӣ ва вилоятҳо, раисони ҳарду палатаи парлумон, аксарияти аъзои ҳукумат доир мегардад, аз фаъолияти ҲХДТ дар соли 2017 натиҷагирӣ шуда, вазифаҳо барои соли 2018 муайян карда мешаванд, хабар дод ба «Азия-Плюс» як манбаъ аз Кумитаи иҷроияи марказии ҲХДТ.
Зимнан қайд шуд, ки дар кори пленум ба масъалаи кор бо аҳолӣ дар самти пешгирии зуҳуроти ифротгароӣ, терроризм ва тарбияи насли наврас дар рӯҳияи ватандӯстӣ таваҷҷуҳи хосса зоҳир хоҳад шуд.
Ҳизби халқии демократии Тоҷикистон соли 1994 таъсис ёфта, раиси ҳизб президенти Тоҷикистон Эмомалӣ Раҳмон аст. Айни замон шумори аъзои ҲХДТ беш аз 480 ҳазор нафарро ташкил медиҳад.
Тибқи маълумоти КИМ ҲХДТ, наздики 40 фоизи аъзои ҳизб ҷавононанд. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
Иҷлосияи 14-уми Маҷлиси миллии Маҷлиси Олии Тоҷикистон баъди анҷоми кори пленуми ҲХДТ, соати 15:00 ба кор шурӯъ мекунад. Вакилон пешниҳодҳои президент доир ба ивази номи чанде аз шаҳру навоҳӣ ва маҳалалҳои аҳолинишин, аз ҷумла Қӯрғонтеппа ва Сарбандро баррасӣ мекунанд, хабар дод ба «Азия-Плюс» як манбаъ аз палатаи болоии парлумони кишвар.
Ғайр аз ин, дар иҷлосияи Маҷлиси миллӣ баррасии қонуни ҶТ «Дар бораи ворид намудани тағйирту илова ба Кодекси андози ҶТ», «Дар бораи зироати ғалладона ва маҳсулоти кокрарди он», «Дар бораи ворид намудани тағйироту илова ва қонуни ҶТ «Дар бораи зотпарварӣ» дар назар аст.
