Гурӯҳи расонаҳои «Азия-Плюс», шабакаи радиои «Садои Душанбе», газетаи «Оила», Viber ва IMO писандидатарин расонаҳо миёни аҳолии кишвар аст.
Аҳолии Тоҷикистон ба барномаҳои фарҳангиву фароғатӣ дар телевизион ва радиои ватанӣ, маводи фароғативу маърифатӣ дар нашрияҳо ва саргармиву дилхушӣ дар шабакаҳои иҷтимоӣ афзалият медиҳад, чунин аст хулосаи таҳқиқоти лоиҳаи муштарки Вазорати фарҳанги Тоҷикистон, ТҶ «Медиа консалтинг», ТҶ МТС «Зеркало», ки бо дастгирии Барномаи грантҳои хурди комиссияи рушди демократияи сафорати ИМА дар Тоҷикистон анҷом пазируфтааст.
«Муддати даҳсолаҳо нашриёти чопӣ, телевизиону радио ВАО-и маъмулӣ маҳсуб меёфтанд, – қайд кард директори ТҶ «Медиа консалтинг» Набӣ Юсупов. – Вале солҳои охир навъҳои тозаи ВАО – интернет, шабакаҳои иҷтимоӣ ва мессенҷерҳо рӯйи кор омаданд. Паҳншавии густардаи онҳо инқилоби технологӣ дар интиқоли маълумот ба амал овард. Яе аз ҳадафҳои таҳқиқоти мо муайян кардани гузаштани аҳолии Тоҷикистон ба истифодаи технологияҳои нав шуморида мешавад».
Дар назарсанҷӣ беш аз 2 ҳазор нафар аз тамоми минтақаҳои Тоҷикистон ширкат варзида, натиҷаҳои кор дар нашрияи ҷудогона чоп шудааст.
«Таҳқиқот устувории гузаштани аҳолии Тоҷикистон ба истифодаи технологияҳои навро нишон дод. Ин пеш аз ҳама, ба рӯйи кор омадани интернет марбут аст. Ба мушоҳида мерасад, ки ҷавонони кишвар пешоҳанги ин раванд мебошанд, вале онҳо интернетро асосан барои суҳбат ва дилхушӣ истифода мекунанд. Имконоти ВАО-и Тоҷикистон дар мессенҷерҳо алҳол истифоданашуда боқӣ мемонад», – иброз дошт директори Маркази таҳқиқоти иҷтимоии «Зеркало» Қаҳрамон Бақозода.
Натиҷаҳои таҳқиқот бозгӯи онанд, ки 94% аз пурсидашудагон тамошобинони барномаҳои телевизион мебошанд Аксарияти онҳо тариқи антеннаҳои хонагӣ (48,8%) ва моҳвораӣ (48,7%) барномаҳои телевизионро қабул мекунанд.
Ба тоҷикистониён бештар тамошои барномаҳои фарҳангиву фароғатӣ (47,9%) ва хабарҳо (37,8%) писанд аст. Дар рейтинги тамошои шабакаҳои телевизионии марказӣ телевизиони «Сафина» устуворона (60,1%) пешсаф аст.
Шабакаҳои телевизиони Тоҷикистонро – 65%-и пурсидашудагон маъқул дониста, дар идома шабакаҳои телевизиони Русия – 18,3% ва Ӯзбекистон – 9,7% қарор доранд.
Радиоро 49,7%-и пурсидашудагон гӯш мекунанд, дар садри рейтинг радиои «Садои Душанбе» қарор дорад. Миёни нашрияҳои мустақил ҳафтаномаи «Оила» ва байни рӯзномаҳои давлатӣ – «Ҷумҳурият» зинаи аввалро ишғол мекунанд.
Дар байни расонаҳои интернетӣ дар шабакаи ВАО-и маъмулӣ Гурӯҳи расонаҳои «Азия-Плюс» пешсафиро аз даст намедиҳад.
Мессенҷерҳои писандидатарин Viber ва IMO дониста шудаанд.
Муаллифони таҳқиқот ҳамчунин хулоса ва тавсияҳоро низ нашр кардаанд, ки моликони ВАО ва мақомоти давлатӣ метавонанд аз онҳо истифода кунанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
