Рӯзҳои наздик шумори ахолии Тоҷикистион ба 9 млн. нафар мерасад. Тифл бояд рӯзҳои наздик чашм ба олами ҳастӣ кушояд.
Ба санаи 1 январи соли 2018 шумори аҳолии Тоҷикистон 8 млн. 931 ҳазор нафарро ташкил дода, дар семоҳаи авали соли равон то ба 8 млн. 973 ҳазор нафар расид.
Бо назардошти аз соли 1998 ҳамасола ба ҳисоби миёна беш аз 2 фоиз афзудани шумори аҳолии ҷумҳурӣ, метавон пешбинӣ намуд, ки сокини 9-миллионуми Тоҷикистон охири моҳи май ба дунё хоҳад омад.
Тибқи маълумоти Агентии омор, моҳи апрел дар Тоҷикистион 20 ҳазор нафар тифлони навзод ба дунё омадаанд ва мутаносибан мувофиқи ҳисобу китоби мутахассисон, то тавлиди тифли сокини 9-миллионуми Тоҷикистон рӯзҳои башумор монда, Вазорати тандурустӣ ва Агентии омор ин лаҳзаро пайгирӣ доранд.
Ёдрас мекунем, ки сокини 7-миллионнуми Тоҷикистон Фаридун 13 августи соли 2006 дар Маркази тиббии шаҳри Душанбе ба дунё омада, мақомоти шаҳрдории пойтахт дар кӯчаи Ҷомӣ ба оилаи онҳо манзили чорҳуҷрадор тақдим намуд.
Сокини 8-миллионаи Тоҷикистон Сумайя Раҳмонова 5-уми феврали соли 2013 дар таваллудхонаи №3-и пойтахт ба дунё омад. Аз ҷониби мақомоти шаҳрдории Душанбе ба оилаи онҳо дар кӯчаи Федини пойтахт хонаи дуҳуҷрадор дода шуд.
Қобили зикр аст, ки аз рӯи сатҳи таваллуд байни собиқ кишварҳои шӯравӣ Тоҷикистон пешсаф аст.
Бино ба маълумоти чанде қабли муовини раиси палатаи поёнии парлумони ҷумҳурӣ Хайринисо Юсуфӣ, шурӯъ аз соли 1998 шумори аҳолии Тоҷикиситон ба ҳисоби миёна ҳамасола ба миқдори 2,1% афзуда, агар чунин суръати афзоиш боқӣ монад, соли 2020 ахолии Тоҷикистон ба 10,65 млн. нафар мерасад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
