Дар кори мизи гирд таҳти унвони «Муқовимат ба терроризм ва ифротгароӣ – омили асосии бунёди ҷомеаи девократӣ ва ҳуқуқӣ» имомхатиби масҷиди Нури Исломи шаҳри Хуҷанд Ибодулло Калонзода изҳор намуд, ки «хуб мешуд, агар дар мактабҳо фанни омӯзиши Исломи ҳақиқиро ҷорӣ мекарданд».
Чорабинии мазкур аз ҷониби Вазорати адлияи Тоҷикистон ва Ташкилоти ҷамъиятии «Дафтари ҷомеаи шаҳрвандӣ» дар вилояти Суғд созмон дода шуда, дар Маркази таълимии Бонки миллӣ дар шаҳри Гулистон баргузор шуд.
Калонзода қайд кард, ки пешниҳоди ҷорӣ кардани чунин фанни таълимӣ дар мактабҳои таҳсилоти умумӣ яке аз омилҳои муқовимат ба қабули таҳрифшудаи ислом аз ҷониби ҷавонон хоҳад шуд, «то ки ҷавонон муқоиса карда тавонанд, ки исломи асил дар куҷост».
Сардори Раёсати бақайдгирии давлатии ташкилотҳои ҷамъиятӣ ва аҳзоби сиёсии Вазорати адлия Раъно Каримзода зикр кард, ки мушкилоти шарҳи нодурусти қонуну ақидаҳои исломӣ хеле ҷиддӣ аст.
«Мо бояд бо ин мушкилот ҳамроҳ мубориза бурда, бо ҳар роҳу восита аз ҷалби ҷавонон ба созмонҳои терористиву ифротгаро ва иштироки онҳо дар даргириҳои мусаллаҳона дар хориҷи кишвар пешгирӣ кунем», – иброз дошт ӯ.
Муовини сардори шуъбаи мубориза бо терроризм ва ифротгароии Раёсати ВКД дар вилояти Суғд Ғолиб Қаландаров дар навбати худ иттилоъ дод, ки айни замон беш аз 80 нафар занон ва 80 нафар ноболиғон аз ҳисоби сокинони вилояти Суғд дар Сурия қарор доранд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
