Касри (камбуди) тавозуни савдои Тоҷикистон ба 1,4 млрд. доллар наздик мешавад: тайи 8 моҳи соли равон ҷумҳурӣ ба маблағи беш аз 2,1 млрд. доллар молу маҳсулот ворид намуда, ҳаҷми содирот бошад, ҳамагӣ наздики 713 млн. долларро ташкил дод.
Бино ба маълумоти Агентии оморои назди президенти ҶТ, давоми моҳҳои январ-августи соли 2018 ҳаҷми муомилоти моли хориҷии Тоҷикистон наздики 2 млрд. 820 млн. долларро ташкил дод, ки нисбат ба ҳамин давраи соли гузашта 19,4% ё худ 458 млн. доллар зиёдтар аст.
Тӯли 8 моҳи соли ҷорӣ ҳаҷми содирот аз ҷумҳурӣ наздики 713 млн. долларро ташкил додааст, ки нисбат ба моҳҳои январ-августи соли гузашта 17% ё худ 103 млн. доллар бештар аст.
Беш аз нисфи ҳаҷми умумии содиротро маҳсулоти минералӣ, 22,1% – металлҳои арзонбаҳо ва маснӯот аз он, 21%-ро маҳсулоти дӯзандагӣ ташкил медиҳад.
Дар 8 моҳи соли ҷорӣ воридот ба маблағи беш аз 2 млрд. 107 млн. доллар сурат гирифтааст, ки нисбат ба ҳамин давраи соли 2017 – 20% ё худ 355 млн. доллар зиёдтар мебошад.
Ҳиссаи нисбатан зиёдтарро дар воридот воситаҳои нақлиёт, мошинҳо ва таҷҳизот (23,2%) ва маҳсулоти минералӣ (18,5%) ишғол мекунанд.
Ҳамин тариқ, тавозуни савдо манфӣ ташаккул ёфта, наздики 1 млрд. 395 млн. долларро ташкил дод. Ҳамин давраи соли гузашта касри тавозуни савдо ба ҳудуди 1,1 млрд . доллар баробар шуда буд.
Нишондиҳандаи рӯйпӯш кардани воридот бо содирот дар моҳҳои январ-августи соли равон 34%-ро ташкил дод. Дар ҳамин давраи соли гузашта ин нишондиҳанда ба 36% расида буд, яъне таносуби содирот ба воридот 2% поин рафт.
Шарики асосии тиҷоратии Тоҷикистон дар ин давра Русия буда, тайи 8 моҳ ҳаҷми муомилоти мол байни Тоҷикистону Русия 651 млн. долларро ташкил дод, ки нисбат ба нишондиҳандаи ҳамин давраи гузашта қариб 10% зиёдтар аст.
Дар ин давра Тоҷикистон бо Қазоқистон – ба маблағи беш аз 553 млн., Чин – 433 млн., Туркия – 268 млн. ва Ӯзбекистон – ба 192 млн. доллар муомилоти молӣ анҷом додааст.
Қобили зикр аст, ки коҳиши ҳаҷми муомилоти мол бо Эрон идома дорад: тӯли 8 моҳи соли ҷорӣ ҳаҷми муомилоти мол байни Тоҷикистону Эрон каме бештар аз 70 млн. долларро ташкил дод, ки нисбат ба ҳаҷми моҳҳои январ-августи соли 2017 ба миқдори 34% камтар аст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
