Суди шаҳри Хуҷанд аризаи журналист ва раҳбари КВН-и Тоҷикистон Хайрулло Мирсаидовро дар бораи дароз кардани муҳлати пардохти ҷарима дар ҳаҷми 80 ҳазор сомонӣ баррасӣ намуд. Ин ҷарима тибқи қарори ҳайати мушовараи зинаи таҷдиди назар (кассатсионӣ)-и суди вилояти Суғд пардохт мешавад.
Худи журналист ба “Азия-Плюс” хабар дод, ки 10 рӯз пеш дар бораи тамдиди муҳлати пардохти ҷарима ариза додааст. Ба мурофиа журналистонро роҳ надода, он пушти дарҳои пӯшида баргузор шуд.
Судяи суди шаҳри Хуҷанд Эраҷ Ализода дар бораи боз ду моҳ дароз кардани муҳлати пардохти ҷаримаи Хайрулло Мирсаидов қарор содир намуд.
Агар ҷарима баъди ду моҳ пардохт нашавад, ӯ дубора ба ҳабс гирифта хоҳад шуд.
“Ман барои он ариза навиштам, ки алҳол ин миқдор маблағро дар даст надорам. Ҳеҷ ҷое кор намекунам, дар хонаи падарам зиндагӣ дорам, оилаи мо аллакай 124 ҳазор сомонӣ пардохт намуд ва бо ҳамин сабаб ман тамдиди муҳлати пардохтро дархост намудам. Қарорҳои содиршудаи суди шаҳри Хуҷанд ва суди вилояти Суғдро ғайриқонунӣ шуморида, аз болояшон ба зинаи назоратӣ шикоят бурдам. Агар лозим шавад, то суди байнулмилалӣ муроҷиат мекунам”, – гуфт Хайрулло Мирсаидов.
Ёдрас мекунем, ки бо қарори ҳайати мушовараи суди вилояти Суғд аз 22 август, Хайрулло Мирсаидов аз толори суд озод карда шуд.
Суди вилоят ҷазо нисбати Мирсаидовро аз рӯи ҳамаи се модда, ки қаблан тибқи онҳо ба ӯ аз ҷониби суди шаҳри Хуҷанд айбнома пешниҳод шуда буд, тағйир дод.
Аз ҷумла моддаҳои 245 ва 345 (маҳрумият аз озодӣ) ба ҷарима дар ҳаҷми наздики 80 ҳазор сомонӣ ва моддаи 346 Кодекси ҷиноии Тоҷикистон ба корҳои ислоҳӣ иваз карда шуданд.
Иҷрои корҳои ислоҳӣ маънои онро дорад, ки Хайрулло Мирсаидов дар ҷойи дилхоҳаш кор карда метавонад ва 20% аз ҳаҷми музди меҳнаташро муддати 2 сол ба буҷети давлатӣ пардохт мекунад.
Суди шаҳри Хуҷанд санаи 11 июл рӯзноманигор ва роҳбари дастаи «КВН Тоҷикистон» Хайрулло Мирсаидовро ба 12 соли зиндон маҳкум намуд. Ӯ дар содир намудани ҷиноятҳои азхудкунӣ ё камомади маблағ, сохтакории ҳуҷҷатҳо ва дидаву дониста додани маълумоти бардурӯғ гунаҳкор эътироф гардид.
Пас аз содир шудани ҳукми суд оилаи Мирсаидов ба сифати ҷуброни зиёни муайяншуда аз ҷониби мақомоти тафтишотӣ ба нафъи давлат 124 ҳазор сомонӣ маблағ пардохт намуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
