Зиндониёни ошӯбгар, ки дар терроризму ифротгароӣ даст доштанд, ҳафт нафар кормандони муассисаи ислоҳиро гаравгон гирифта буданд, хабар дод вазири корҳои дохилии Тоҷикистон Рамазон Раҳимзода имрӯз зимни нишасти матбуотӣ.
Бино ба гуфтаи ӯ, дар паноҳи гаравгонон онҳо ба пешниҳоди ҳар гуна талабҳои таҳдидомез ба ҳукуматдорон оғоз намуданд. Дар ҳамин ҳол, вазир аз ифшои мушаххаси талабҳои ошӯбгарон худдорӣ намуд.
“Барои озод кардани одамон дастаи таъиноти махсуси милитсия (ОМОН) ҷалб шуда, мутаассифона, ду нафари онҳо куштаву панҷ нафар наҷот дода шуданд”, – қайд кард вазир.
Ёдрас мекунем, ки қаблан зимни нишасти матбуотӣ сардори Раёсати мубориза бо коррупсияи Агентии зиддифасоди ҷумҳурӣ Муҳаммадсаид Файзуллозода хабар дода буд, ки чанде аз кормандон муассисаи ислоҳии №3/3-и шаҳри Хуҷанд, ки шаби 8 ноябри соли гузашта дар он ошӯб сар зад, дар муносибат бо маҳкумшудагон ба амалҳои коррупсионӣ даст мезадаанд.
Дар бораи чӣ гуна амалҳои коррупсионӣ содир шудан байни кормандони муассиса ва маҳбусон ӯ маълумот надод.
Бино ба маълумоти расмӣ, дар исёни муассисаи ислоҳии шаҳри Хуҷанд 21 нафар маҳбусон, ки асосан ба иттиҳоми терроризм маҳкум шуда буданд ва 2 нафар корманди муассиса ҳалок шуданд.
Гурӯҳи махсуси Прокуратураи генералии Тоҷикистон ба тафтиши ҳодисаи исёни маҳбусон дар ин муассиса машғул аст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
