Раисҷумҳури Тоҷикистон Эмомалӣ Раҳмон дар бораи гузаронидани барӯйхатгирии аҳолӣ ва фонди манзили Ҷумҳурии Тоҷикистон дар соли 2020 фармон ба имзо расонид.
Дар фармони 30-юми сентябр имзошуда супориш дода мешавад, ки маъракаи барӯйхатгирии аҳолӣ ва фонди манзил дар давраи аз 1 то 15 октябри соли 2020 гузаронида шавад.
Ҳукумати ҷумҳурӣ ҷиҳати андешидани чораҳои зарурӣ баҳри дар сатҳи баланд ташкил намудан ва гузаронидани барӯйхатгирии аҳолӣ ва фонди манзил вазифадор шудааст.
Ба мақомоти иҷроияи ҳокимияти давлатии ВМКБ, вилоятҳо, шаҳри Душанбе, шаҳру ноҳияҳо супориш дода шудааст, ки ба мақомоти давлатии омор дар гузаронидани маъракаи барӯйхатгирии аҳолӣ ва фонди манзил ҳамаҷониба мусоидат кунанд.
Ёдрас мекунем, ки маъракаи барӯйхатгирии аҳолӣ ва фонди манзил дар Тоҷикистон бори охир соли 2010 доир гардид.
То тирамоҳи соли 2010 шумори аҳолии Тоҷикистон 7 млн. 565 ҳазор нафарро ташкил дода буд, ки нисбат ба соли 2000-ум 1 млн. 438 ҳазор нафар бештар аст.
Барои гузаронидани ин маърака он замон аз буҷети давлатӣ 27 млн. сомонӣ (беш аз 6,1 млн. доллар) маблағ ҷудо шуда, ба кори он зиёда аз 30 ҳазор нафар ҷалб гардиданд.
Қобили зикр аст, ки мувофиқи тавсияҳои Созмони Милали Муттаҳид, дар саросари ҷаҳон ҳар як 10 сол маъракаи барӯйхатгирии аҳолӣ гузаронида мешавад.
Аввали соли 2018 шумори аҳолии Тоҷикистон наздики 8 млн. 931 ҳазор нафарро ташкил дод. Моҳи май дар ҷумҳурӣ сокини 9-миллионум ба дунё омад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
