Дар Кумитаи забон ва истилоҳоти назди ҳукумати Тоҷикистон доир ба таҳияи лоиҳаи нави «Қоидаҳои имлои забони тоҷикӣ» гурӯҳи корӣ таъсис дода шуд.
Тавре АМИТ “Ховар” иттилоъ медиҳад, гӯрӯҳро ёвари Президенти ҶТ оид ба рушди иҷтимоӣ ва робита бо ҷомеа, академик Абдуҷаббор Раҳмонзода роҳбарӣ мекунад.
Ҳайати гурӯҳ аз олимони забоншиноси Академияи илмҳои Тоҷикистон, пажӯҳишгоҳҳои соҳавӣ ва донишгоҳу донишкадаҳои олии ҷумҳурӣ иборат аст.
Гурӯҳи корӣ барои баррасӣ ва омӯзиши лоиҳаи нави «Қоидаҳои имлои забони тоҷикӣ», ки аз ҷониби Кумита бо ҷалби мутахассисони забоншинос ва олимон таҳия гардида буд, супориш гирифта, ҳамзамон вазифадор карда шуд, ки таклифу пешниҳодоти мутахассисони забондон ва кафедраҳои забоншиносии мактабҳои олии мамлакатро дар муддати ду ҳафта мавриди баррасӣ қарор диҳад.
Гурӯҳи корӣ бо мақсади иҷрои дастуру супоришҳои Президенти Тоҷикистон Эмомалӣ Раҳмон, ки ба муносибати Рӯзи забони давлатӣ 4 октябри соли 2019 зимни мулоқот бо намояндагони аҳли зиё, маориф, илм, адаб ва фарҳанг оид ба ислоҳи камбудиҳову мушкилоти «Қоидаҳои имлои забони тоҷикӣ» баён гардида буд, таъсис дода шуд.
Зикр мешавад, ки баъд аз баррасии ниҳоӣ лоиҳаи нави «Қоидаҳои имлои забони тоҷикӣ» моҳи январи соли 2020 барои тасдиқ ба ҳукумати ҷумҳурӣ пешниҳод карда мешавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
