Дар моҳҳои январ-сентябри соли равон бо ташаббуси маъмурият 6,4 ҳазор нафар дар Тоҷикистон ба рухсатии маҷбурӣ фиристода шуданд.
Тавре Агентии омори назди Президенти ҶТ иттилоъ медиҳад, дар ҳамин ҳол 3,4 ҳазор нафари онҳо бе ҳифзи музди меҳнат мондаанд.
Гуфта мешавад, 300 нафар дар реҷаи ҳафтаи нопурраи корӣ ва рӯзи кории нопурра фаъолият кардаанд.
“Сатҳи бекорӣ бо назардошти бекории пинҳонӣ 2,4%-и қувваҳои кориро ташкил дод”, – қайд мекунанд дар Агентии омор.
Бекории пинҳонӣ машғулияти нопурра мебошад, ки аз сабаби бозистодани истеҳсолот як қисми кормандон ба рухсатии маҷбурӣ ё ба корҳои реҷаашон ҳафтаи нопурра ва ё рӯзи кории нопурра мераванд.
Шумори қувваи корӣ дар моҳи сентябри ҷорӣ 2 млн. 381 ҳазор нафарро ташкил дод.
Тибқи маълумоти расмӣ, теъдоди бекорон (бо назардошти бекории пинҳонӣ) ҳамагӣ 57 ҳазор нафар будааст.
Дар ҳамин ҳол, тӯли нуҳ моҳи соли равон наздики 40 ҳазор ҷойи нави корӣ таъсис дода шудааст.
Аз ҷумла, беш аз 25 ҳазор ҷойи кори доимӣ, зиёда аз 8 ҳазор ҷойи кори муваққатӣ ва беш аз 6 ҳазор ҷойи кори мавсимӣ фарҳам оварда шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
