Яке аз корбарони шабакаи иҷтимоии Facebook 22-юми декабр бо ирсоли акси қоидавайронкунии як ронанда аз Раёсати ВКД дар шаҳри Душанбе хоҳиши чораандешӣ кардааст.
Маркази матбуотии раёсати мазкур хабар медиҳад, ки ин муроҷиат таҳти назорат ва баррасии ҳамаҷониба қарор дода шуд.
Дар натиҷа муайян гардид, ки ронандаи воситаи нақлиёти тамғаи “Опел-астра”, рақами қайди давлатиаш 8075 РВ 01, шаҳрванд Саиданвар Расулов, соли таваллудаш 1997, сокини шаҳри Кӯлоб ба қоидавайронкунии дағал роҳ дода, мошини худро дар ҷойи номуқаррар нигоҳ доштааст. Ин амали ӯ боиси халал ба ҳаракати воситаи нақлиёти ҷамъиятӣ (тролейбуси № 8) дар назди таваққуфгоҳи боғи ба номи А.Рӯдакӣ ва норозигии шаҳрвандон гардидааст.
Барои таваққуфи нодуруст ва эҷоди монеа ба ҳаракати воситаи нақлиёти ҷамъиятӣ нисбат ба шаҳрванд Саиданвар Расулов бо моддаи 324 (Риоя накардани талаботи аломатҳои роҳ, нишонаҳои қисми роҳ ва дигар қоидаҳои ҳаракат дар роҳ)-и Кодекси ҳуқуқвайронкунии маъмурии ҶТ парвандаи маъмурӣ тартиб дода шуда, мошини ӯ ба ҷаримагоҳи Шуъбаи БДА Раёсати ВКД дар шаҳри Душанбе интиқол гардид.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
