Вазорати тандурустӣ ва ҳифзи иҷтимоии аҳолии Тоҷикистон тасмим гирифтааст, ки дар ҳолати эълони карантин дар ҷумҳурӣ гурӯҳи ёварони ихтиёрӣ таъсис диҳад.
Бино ба иттилои ин ниҳод, дар ин бора 26-уми март муовини якуми вазири тандурустӣ Саида Умарзода зимни ҷаласаи навбатии ситоди вазорат оид ба пешгирии сирояти коронавирус ва андешидани чораҳои қатъӣ ҷиҳати пешгирии интиқоли сирояти мазкур ба мамлакат супориш додааст.
Ба таъсиси гурӯҳи ёварони ихтиёрӣ (волонтёрон) ва сафарбар кардани онҳо барои гузаронидани корҳои фаҳмондадиҳӣ дар байни аҳолӣ марказҳои тарзи ташаккули ҳаёти солим ва матбуоти вазорат муваззаф шуданд.
Дар ҷаласа инчунин масъалаҳои омодагии муассисаҳои тандурустӣ ба ҳолати эҳтимолии хуруҷи коронавирус, аз ҷумла, бистарӣ ва табобат кардани сироятёфтагон, дар ҳолатҳои ба қайд гирифтани сирояти мазкур таъмини шуъбаҳои эҳё бо таҷҳизоти зарурӣ, муносибат бо нафарони сироятёфта, таъмини муассисаҳои тандурустӣ бо мавод ва таҷҳизот барои пешгирии коронавирус, баланд бардоштани сатҳи касбияти мутахассисони тиб дар ҳолати эълони карантин дар миқёси ҷумҳурӣ, саҳми табибони оилавӣ дар ин ҳолат баррасӣ шуданд.
Таъкид карда шуд, ки новобаста ба он ки то имрӯз сирояти коронавирус дар Тоҷикистон ба қайд гирифта нашудааст, аммо дар ҳолати эҳтимолии хуруҷи сирояти мазкур, аз ҷумла, бистарӣ ва табобат кардани нафарони сироятёфта муассисаҳои тандурустӣ бояд ҳамаҷониба омода бошанд.
Дар идомаи ҷаласа роҳбарони муассисаҳои тандурустӣ вобаста ба рафти корҳои омодагӣ ҷиҳати пешгирии интиқоли сирояти коронавирус, аз ҷумла, захираи мавод ва молҳои тиббӣ, муҳайё кардани шароит ва имконоти мусоид ба шаҳрвандоне, ки дар карантин қарор доранд ва дигар масъалаҳои марбута ҳисобот доданд.
Қобили зикр аст, ки 25-уми март аз ҷониби Хадамоти федералии ҳимояи ҳуқуқи истеъмолкунандагони Русия (Роспотребнадзор) ба Вазорати тандурустӣ ва ҳифзи иҷтимоии аҳолии ҶТ барои муайян кардани коронавирус 20 ҳазор тести оҷилӣ ҷудо карда шуд.
Ёдовар мешавем, ки аз 1-уми феврал то 25-уми марти соли равон 5460 нафар шаҳрвандоне, ки аз кишварҳои хориҷ ба Тоҷикистон ворид гардиданд, дар беморхонаҳои сироятӣ ва осоишгоҳҳои мамлакат ба карантин фаро гирифта шуданд. Аз ин шумора то санаи мазкур 2002 нафари онҳо ба хонаҳояшон рухсат дода шуда, 3458 нафарашон дар карантин мондаанд. Дар миёни шахсони ба карантин фаро гирифташуда 107 нафарашон шаҳрвандони хориҷӣ мебошанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
