Соли гузашта ба буҷети Тоҷикистон аз ҳисоби пардохтҳои гумрукӣ зиёда аз 5,4 млрд сомонӣ ворид гардид, изҳор дошт муовини аввали сардори Хадамоти гумруки ҷумҳурӣ Азим Турсунзода зимни нишасти хабарии рӯзи 18 феврал.
Ин нишондиҳанда, ба қавли ӯ, 680,9 млн сомонӣ ё худ ба андозаи 14,2% зиёдтар аз нақшаи пешбинишуда аст.
Соли 2020 ба ҷумҳурӣ ба маблағи 272,6 млн доллар маҳсулоти нафтӣ, 243,2 млн доллар – гандум, 177,4 млн доллар – гази моеъ оварда шудааст.
Ҳамчунин соли гузашта аз хориҷи кишвар ба Тоҷикистон ба маблағи умумии 31,8 млн доллар гӯшти мурғ ворид карда шудааст.
Вазъи ноустувори молиявӣ ва номусоиди эпидемилогӣ, инчунин сустшавии рушди иқтисоди кишварҳои шарикони асосии савдои Тоҷикистон ба воридоти воситаҳои нақлиёт ва ҷамъоварии пардохтҳои гумрукӣ таъсири манфӣ расонид.
Тавре ки Азим Турсунзода қайд кард, соли 2020 воридоти воситаҳои нақлиёт ба маблағи 191,1 млн доллар кам шудааст.
Соли гузашта тарифу имиёзҳои додашуда мувофиқи қонунгузорӣ дар шакли пурра ё қисман озод кардан аз пардохтҳои гумрукӣ 77,7% аз ҳаҷми умумии воридоти маҳсулотро ташкил доданд.
Арзиши гумрукии ин молу маҳсулот ба 2 млрд 344 млн доллар, маблағи пардохтҳои гумрукии озодшуда ба ҳисоби миёна ба зиёда аз 3 млрд сомонӣ баробар шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
